زانایان ڕێگایەکی نوێیان دۆزیوەتەوە بۆ گۆڕینی
پلاستیک بۆ "ترشی ئەسیتیک" کە پێکهاتەی سەرەکی سرکەیە .
بەپێی هەواڵێکی
ماڵپەڕی"UOW"، لە هەنگاوێکی نوێدا بۆ بەرەنگاربوونەوەی پیسبوونی
ژینگە، گروپێک لە توێژەران ڕێگەیەکی داهێنەرانەیان دۆزیوەتەوە کە تێیدا تیشکی خۆر
بەکاردەهێنرێت بۆ گۆڕینی پاشماوە پلاستیکییەکان بۆ ترشی ئەسیتیک، کە پێکهاتەی
سەرەکیی سرکەیە و لە هەمان کاتدا ماددەیەکی خاوی گرنگە لە چەندین پیشەسازیی
جیاوازدا.
ئەم پڕۆسەیە سوودی لە جۆرە کەڕوویەکی
دارستان وەرگرتووە، هەروەها سوود لە کیمیکە هاندەری تایبەت لە ئاسن وەردەگرێت.
جیاوازیی ئەم ڕێگەیە لەگەڵ شێوازە
کۆنەکانی ڕیسایکلین ئەوەیە کە پێویستی بە پلەی گەرمی یان پەستانی زۆر بەرز نییە و
لە پلەی گەرمی ژووردا کار دەکات.
کیمیکە هاندەرەکە تیشکی خۆر
بەکاردەهێنێت بۆ تێکشکاندنی زنجیرە کاربۆنییە ئاڵۆزەکانی ناو پلاستیک و گۆڕینیان
بۆ گەردی بچووکتر کە لە کۆتاییدا دەبنە ترشی ئەسیتیک.
ئەم دۆزینەوەیە تەنها یارمەتیدەر
نییە بۆ کەمکردنەوەی پاشماوەکانی وەک بوتڵ و کیسەی پلاستیک لە زبڵدانەکاندا، بەڵکو
دەبێتە سەرچاوەیەکی نوێ بۆ بەرهەمهێنانی ماددە کیمیاییەکان کە لە دروستکردنی
دەرمان، ڕیشاڵی دەستکرد و ڕەنگەکاندا بەکاردێن.
بەم شێوەیە پلاستیک لە بارگرانییەکی
ژینگەییەوە دەگۆڕدرێت بۆ سەرچاوەیەکی کاربۆنی بەنرخ، ئەمەش هەنگاوێکی گەورەیە
بەرەو پەیڕەوکردنی سیستەمی ئابووریی بازنەیی کە تێیدا هیچ شتێک بەفیڕۆ ناچێت.