لە کاتی گەڕانەوەدا بۆ ماڵەوە شۆفێرێک توشی ڕوداوێکی سەیر بوو کە تەواوی ڕۆژەکەی گۆڕی ئەویش ڕوبەڕوبونەوەی بوو لەگەڵ مارێکی پایتۆندا.

بە پێی هەواڵێکی ماڵپەری "a.z animals"، لە ڕووداوێکی دەگمەن و سەرنجڕاکێشدا لە ویلایەتی فلۆریدا، شۆفێرێک توانی ئاسکێک لە مردنێکی ئاشکرا ڕزگار بکات دوای ئەوەی بینی مارێکی پایتۆنی زۆر گەورە لە کەناری ڕێگایەکی گشتیدا جەستەی ئاسکەکەی توند گوشیبوو.

ڤیدیۆی ڕووداوەکە لە یوتیوب دەنگدانەوەی زۆری هەبووە، نیشانی دەدات شۆفێرەکە بە بوێرییەکی زۆرەوە و بە بەکارهێنانی لقە دارێکی درێژ هێرش دەکاتە سەر مارەکە، ئەمەش وای کرد مارە پایتۆنەکە نێچیرەکەی بەجێبهێڵێت و بەرەو ناو دارستانەکە ڕابکات.

پسپۆڕانی ژینگە ئاماژە بەوە دەکەن کە ئەم جۆرە مارە، کە بە پایتۆنی(Reticulated) دەناسرێت، درێژترین جۆری مارە لە جیهاندا و توانایەکی سەرسوڕهێنەری هەیە لە قووتدانی نێچیری گەورەی وەک ئاسک و بەرازی کێوی، ئەوەش بەهۆی هەبوونی ئێسکی سەری نەرم و بەستەرە لاکێشەکانی کە ڕێگەی دەدات دەمی زۆر زیاتر لە قەبارەی ئاسایی خۆی بکاتەوە.

ئەگەرچی ئەم جۆرە مارە زۆرتر وەک ئاژەڵی ماڵی هەڵاتوو لە فلۆریدا دەبینرێت، بەڵام مەترسییەکی گەورە بۆ سەر هاوسەنگیی ژینگەیی ناوچەکە دروست دەکات.

لەگەڵ ئەوەی کاری شۆفێرەکە بووەتە جێی دەستخۆشی زۆرێک لە بینەران، بەڵام شارەزایانی ئاژەڵە کێوییەکان هۆشداری دەدەن کە نزیکبوونەوە لە مارێکی وەها گەورە لە کاتی ڕاوکردندا کارێکی زۆر مەترسیدارە.

بەرپرسانی ناوچەکە داوا لە هاوڵاتییان دەکەن لە کاتی ڕووبەڕووبوونەوەی لەم شێوەیەدا پەیوەندی بە تیمە تایبەتەکانەوە بکەن، چونکە پایتۆنەکان ئاژەڵی زۆر بەهێزن و دەستوەردان لە کاتی نانخواردنیاندا دەکرێت ئەنجامی مەترسیداری بۆ سەر ژیانی مرۆڤ هەبێت.