پسپۆڕانی بواری تەندروستی هۆشداری توند دەدەن لە زۆر بەکارهێنانی دەرمانی ئازارشکێن، کە دەبنە هۆی تێکچوونی کارکردنی گورچیلەکان.

بەپێی هەواڵێکی ماڵپەڕی "ndtv"، پسپۆڕانی بواری تەندروستی هۆشداری دەدەن لەوەی کە زۆر بەکارهێنانی دەرمانە ئازارشکێنەکان، بەتایبەتی ئەو جۆرانەی کە بە(NSAIDs) ناسراون وەک "دایکلۆفیناک" و "ئایبوپڕۆفین"، مەترسییەکی گەورە لەسەر تەندروستی گورچیلەکان دروست دەکەن.

گورچیلەکان بەرپرسن لە پاڵاوتنی پاشماوەکان و ڕێکخستنی پەستانی خوێن، بەڵام بەکارهێنانی زۆری ئەم دەرمانانە دەبێتە هۆی تێکچوونی کارەکانیان.

بەپێی گوتەی دکتۆر ئەنەنت کومار، پسپۆڕی نەشتەرگەری گورچیلە، ئەم دەرمانانە دەبنە هۆی تەسکبوونەوەی بۆرییەکانی خوێن لەناو گورچیلەدا، ئەمەش پرۆسەی فلتەرکردن لاواز دەکات و دەبێتە هۆی سستبوونی کتوپڕی گورچیلە.

هەندێک لە زیانە سەرەکییەکانی بەکارهێنانی درێژخایەنی ئازارشکێنەکان بریتین لە:

١. کەمبوونەوەی لێشاوی خوێن: تەسککردنەوەی بۆرییەکانی خوێنی ناو گورچیلە و کەمکردنەوەی توانای کارکردنیان.

٢. سستبوونی کتوپڕی گورچیلە (AKI): دابەزینی لەناکاوی توانای گورچیلە کە مەترسی لەسەر ژیان دروست دەکات.

٣. نەخۆشی درێژخایەنی گورچیلە: زیادبوونی مەترسی سستبوونی هەمیشەیی، بەتایبەت لەو کەسانەی نەخۆشی شەکرە یان پەستانی خوێنیان هەیە.

٤. برینداربوونی شانەکانی گورچیلە: تێکچوونی هەمیشەیی خانەکانی گورچیلە کە ڕەنگە لە تەمەنێکی گەنجیشدا مرۆڤ تووشی سستبوونی کۆتایی گورچیلە بکات.