سەرۆک وەزیرانی عێراق لە پەیوەندییەکی تەلەفۆنیدا لەگەڵ سەرۆک کۆماری ئێران، جەختی لە پشتیوانیی بەغدا بۆ سەقامگیری و رەتکردنەوەی جەنگ لە ناوچەکەدا کردەوە.
ئەمڕۆ چوارشەممە ١١ـی ئازاری ٢٠٢٦، نووسینگەی راگەیاندنی سەرۆک وەزیرانی عێراق بڵاویکردەوە، محەمەد شیاع سودانی، لە پەیوەندییەکی تەلەفۆنیدا لەگەڵ مەسحود پزیشکیان هێرشەکانی سەر ئێرانی سەرکۆنە کرد و ئامادەیی وڵاتەکەشی بۆ نێوەندگیری دەربڕی تاوەکو هەموان بگەڕێنەوە بۆ زمانی گفتوگۆ و دۆزینەوەی چارەسەری ئاشتییانە بۆ کێشەکان.
بەپێی راگەیەندراوەکە، سودانی بەناوی حکومەت و گەلی عێراقەوە پرسە و سەرەخۆشی خۆی بۆ
کوژرانی (شەهیدبوونی) عەلی خامنەیی، رێبەری باڵای ئێران و ئەندامانی خێزانەکەی و گەلی
ئێران دەربڕی، هیوای چاکبوونەوەی خێرای بۆ بریندارەکانیش خواست.
سودانی جەختی کردەوە رێگە نادەن خاکی وڵات بۆ هێرشکردنە سەر ئێران بەکاربهێنرێت، هەروەها بۆردوومانکردنی عێراقی وەک پێشێلکردنی سەروەری ناوبرد و رایگەیاند ئەم کردەوانە هەوڵەکانیان بۆ گەڕانەوەی ئارامی و پاراستنی ئاسایشی نێودەوڵەتی پەکدەخەن.
لە بەرامبەردا،
مەسعود پزیشکیان سوپاسی هەڵوێستەکانی عێراقی کردووە بۆ رەتکردنەوەی بەکارهێنانی هێز
لە چارەسەرکردنی ململانێکان و هەوڵەکانی بەغدا بۆ پاراستنی سەقامگیری ناوچەکە،
هاوکات پەرۆشی ئێرانی بۆ پاراستنی سەروەری خاکی عێراق دووپاتکردەوە.