هونەرمەندی دیاری کورد، دەشتی کەڵهوڕی نوێترین بەرهەمی خۆی بڵاوکردەوە و پێشکەشی کەلار و گەرمیانی کرد.

دەشتی کەڵهوڕی، لە لێدوانێکدا بۆ ئێن ئار تی دوو رایگەیاند، نوێترین بەرهەمی خۆی بە ناوی "کەلار" بڵاوکردووەتەوە و وەک دیارییەکیش پێشکەشی کەلار و ناوچەی گەرمیانی دەکات.

دەشڵێت "کارێک کە تیایدا بە ئاواز و مەقامی گەرمیانی، سۆزی خۆم بۆ ئەم خاکە دەردەبڕم، لە بەشی کۆتایی ئەم بەرهەمەدا، وەسێتنامەیەک بە مقام دەچڕم کە گوزارشتە لە قووڵایی خەم و شکۆی ئەم شارە".

ئاوازی گۆرانییەکە لەلایەن هونەرمەند خۆیەوە دانراوە، موزیک و دابەشکردنەکەشی ئەمیر جەباریان ئەنجامیداوە و هۆنراوەکەشی لە نووسینی ئەکرەم هەواسە.

دەشتی کەڵهوڕی لە دیارترین گۆرانیبێژانی کوردە و لە شاری کەرکووک لەدایکبووە، بەڵام خۆی لە کەلار ژیاوە و ماوەی 24ساڵە لە ئەوروپا ئەژی، زیاتر لە 10 ساڵە وەکو گۆرانیبێژ دەرکەوتووە و زۆربەی بەرهەمەکانی لە ئاستی ناوەڕۆکدا نیشتمانیین.