زانایان بۆیان دەرکەوتووە کە فرە جووڵەیی و کەمی
سەرنج تەنها یەک جۆر نییە بەڵکو دابەشدەبنە سەر چەند جۆرێکی جییاواز.
بە پێی
توێژینەوەکانی دەزگای American Psychiatric Association
(APA) تێکچوونی کەمیی
سەرنج و فرەجوڵەیی، کە بە کورتکراوەی ADHD دەناسرێت، تەنها وەک
"سەرکێشی" یان "تەمەڵی" نییە، بەڵکو جیاوازییەکی بایۆلۆژییە
لە شێوازی کارکردنی مێشکدا کە کار دەکاتە سەر کۆنتڕۆڵکردنی ڕەفتار و سەرنجدان.
ئەم تێکچوونە
دەمارییە کار دەکاتە سەر گواستەرەوە کیمیاییەکانی مێشک (وەک دۆپامین) و دەبێتە هۆی
ئەوەی کەسی تووشبوو لە ڕێکخستنی کات، تەواوکردنی ئەرکەکان و کۆنتڕۆڵکردنی کتوپڕی
ڕەفتارەکانیدا تووشی زەحمەتی ببێت.
گرنگترین
زانیاری ئەوەیە کە ADHD سێ جۆری سەرەکی هەیە کە نیشانەکانیان
لە کەسێکەوە بۆ کەسێکی تر دەگۆڕێت
جۆری یەکەم:
بێسەرنجی (Inattentive Type) لەم جۆرەدا کەسەکە بە زەحمەت
دەتوانێت بۆ ماوەیەکی درێژ سەرنج بدات، زۆر شت لە بیر دەکات، زوو مێشکی بە شتی
جیاواز جیاوازەوە سەرقاڵ دەبێت و لە جێبەجێکردنی ڕێنماییە وردەکاندا تووشی کێشە
دەبێت،بەڵام مەرج نییە ئەوەی ئەم حاڵەتەی هەبێ لە هەمان کاتدا فرە جوڵەش بێ
جۆری دووەم:
فرەجوڵەیی و سەرکێشی (Hyperactive-Impulsive Type)کەسەکە هەست
دەکات وەک بزوێنەرێک کار دەکات و ناتوانێت بۆ ماوەیەکی درێژ لە شوێنێک
دانیشێت،هەروەها زۆر قسە دەکات، یان بڕیاری خێرا و بێ بیرکردنەوە دەدات و زۆرجار
ناتوانێت چاوەڕێی نۆرەی خۆی بکات
جۆری سێیەم:
تێکەڵاو (Combined Type) ئەمە باوترین جۆرە کە تێیدا نیشانەکانی هەردوو
جۆری یەکەم و دووەم پێکەوە لە کەسەکەدا دەردەکەون، واتە هەم کێشەی فرە جوڵەیی هەیە
و هەم کێشەی بێ سەرنجیش.