دوای زیاتر لە ٥٠ ساڵ دابڕان، ئاژانسی ناسا ئامادەکارییەکانی بۆ گەشتە مێژووییەکەی "ئارتەمیس ٢" تەواو کردووە.

ئاژانسی ناسا بە ئەنجامدانی گەشتێکی بێ وێنە جیهانی تووشی شۆک کردووە و بڕیارە لە ساڵی ٢٠٢٦ گەشتی مێژوویی ئارتەمیس ٢ ئەنجام بدرێت کە دەبێتە یەکەم وەرچەرخانی گەورەی مرۆڤایەتی بۆ گەڕانەوە بۆ دەوروبەری مانگ دوای زیاتر لە نیو سەدە دابڕان.

لەم ئەرکەدا چوار ئاسمانەوانی لێهاتوو کە بریتین لە ڕید وایزمان و ڤیکتۆر گڵۆڤەر و کریستینا کۆک و جێرمی هانسن لە ڕێگەی کەشتیی ئۆراین و بەهێزترین موشەکی ناسا بەرەو قووڵایی بۆشایی ئاسمان بەڕێ دەکەون و ئەم تیمە زۆر جیاوازە چونکە بۆ یەکەمجار ژنێک و ئاسمانەوانێکی ڕەشپێست و هاووڵاتییەکی کەنەدی لە گەشتێکی مانگدا لەخۆدەگرێت.

ئەم تیمە بۆ ماوەی نۆ ڕۆژ لە گەشتێکی بەردەوامدا دەبن و تا دوورترین خاڵ لە زەوییەوە دەڕۆن کە مرۆڤ تا ئێستا پێی گەیشتبێت و ئەرکی سەرەکییان سووڕانەوەیە بە دەوری بەشی پشتەوەی مانگ و تاقیکردنەوەی وردی سیستەمەکانی ژیانە تاوەکو ڕێگە خۆش بکەن بۆ گەشتەکانی ئارتەمیس ٣ و ٤ لە ساڵانی ٢٠٢٧ و ٢٠٢٨ کە ئامانجیان نیشتنەوەی ڕاستەوخۆی مرۆڤە لەسەر جەمسەری باشووری مانگ و دامەزراندنی وێستگەیەکی بەردەوام بۆ گەشتەکانی داهاتوو بەرەو هەسارەی مەریخ.

گەورەترین مەترسی لەم گەشتەدا بریتییە لە تیشکە گەردوونییەکان چونکە ئاسمانەوانەکان بۆ ماوەیەکی زۆر لە دەرەوەی پشتێنەی پارێزەری زەوی دەمێننەوە و ئەمەش مەترسی تووشبوون بە نەخۆشییە مەترسیدارەکان زیاد دەکات هەروەها مەترسییەکی تری گەورە لە کاتی گەڕانەوەدایە چونکە کەشتیی ئۆراین بە خێراییەکی یەکجار زۆر نزیکەی ٤٠ هەزار کیلۆمەتر لە کاتژمێرێکدا دەگەڕێتەوە و پارێزەرە گەرمییەکەی دەبێت بەرگەی پلەی گەرمییەک بگرێت کە دەگاتە ٢٧٦٠ پلەی سیلیزی کە ئەمە تاقیکردنەوەیەکی سەختە بۆ سەلامەتیی تیمەکە و هەر تێکچوونێکی بزوێنەرەکانیش دەکرێت گەڕانەوەیان ئەستەم بکات بەڵام ناسا چەندین سیستەمی یەدەگی بۆ پاراستنیان دابین کردووە.