لە مانگی رەمەزاندا زۆرێک لە ئێمە دەکەوینە ناو داوی هەڵە باوەکانی خۆراک و چالاکی جەستەیی، لێرەدا ئاماژە بە چەند هەڵەیەکی باو دەکەین کە ساڵانە دووبارە دەبنەوە و دەبنە هۆی تێکچوونی تەندروستی.

لە ماڵپەڕی " foochia"بڵاوکراوەتەوە، بۆ ئەوەی بە شێوازێکی تەندروست رۆژوو بگریت، پێویستە لە چەند تێگەیشتنێکی هەڵە دوور بکەویتەوە، یەکەمیان پرسی تینوویەتییە، چونکە خواردنەوەی بڕێکی زۆر لە ئاو لە کاتی پارشێودا سوودی نییە و جەستە ڕاستەوخۆ فڕێی دەداتە دەرەوە، بۆیە باشترە خواردنەوەی بڕی ئاوەکە بەسەر هەموو شەوەکەدا دابەش بکرێت، دووەمیان ترسی لەدەستدانی ماسولکەیە کە ئەمەش بۆچونێکی ڕاست نییە چونکە جەستە سەرەتا پشت بە شەکر و چەوری دەبەستێت.

هەروەها وەرزشکردن لە کاتی بەڕۆژووبووندا نەک مەترسیدار نییە، بەڵکو بۆ کەسانی تەندروست یارمەتیدەرە بۆ سووتانی چەوری، بەمەرجێک پلەی گەرمی بەرز نەبێت و کاتی گونجاو هەڵبژێردرێت.

جگە لەوەش پەنابردن بۆ شەکر لە پارشێودا بۆ بەدەستهێنانی وزە هەڵەیەکی گەورەیە، چونکە دەبێتە هۆی دابەزینی خێرای شەکری خوێن و هەستکردن بە برسێتی، بەڵام کاربۆهیدراتە ئاڵۆزەکانی وەک نیسک و نانی جۆ وزەیەکی بەردەوامت پێ دەبەخشن.