هونەرمەند میدیا حسێن ئەلبوومی باران و ئەوینی بڵاوکردەوە کە حەوت گۆرانی لە خۆی گرتووە.

بەرهەمەکان کە حەوت گۆرانین، لە ئاواز و هۆنراوەی هونەرمەند خۆیەتی، میوزیک و ئامادەکردنی لەلایەن نزار زێوێییەوە بۆ ئەنجامدراوە و کاری میکس و ماسترینگی لەلایەن ئەفشین جەمالەوە بۆ کراوە، هەروەها لەلایەن ژەنیارانی گروپی میوزیکی لوڕەوە کاری دروستکردنی میوزیکی بۆ کراوە.

وەک هونەرمەندەکە خۆی پێشتر رایگەیاندبوو "سەرجەم ئاواز و هۆنراوەکان هی خۆمە و ماوەی ١٠ ساڵە بەرهەمەکان تەواو بوون و بە هۆکاری بارودۆخی سیاسی کوردستان بڵاومان نەکردەوە".

ناونیشانی گۆرانییەکانی ناو ئەلبوومەکە بەمشێوەیەن "باران و ئەوین، شیرین، سلێمانی، بەس بێ، ساقیە، دڵ، زیندان و سووتان".

هونەرمەند میدیا حسێن لەدایکبووی شاری سلێمانییە، لە ساڵانی هەشتاکانی سەدەی رابردوو دەستی بەکاری هونەری کردووە، خاوەنی دەیان گۆرانی و ئاواز و هۆنراوەیە جگە لە چەندین ڤیدیۆ کلیپ، تا ئێستاش بەشێکی زۆر لە هونەرمەندان گۆرانییەکانی دەڵێنەوە.

M.B