کۆبوونەوەکەی نێوان ئۆجەلان و شاندەکە سێ کاتژمێری خایاندووە و تەواوی وردەکارییەکانی دیدارەکە کراوەتە کۆنوسێک و دراوە بە نوعمان کورتوڵموشی سەرۆک پەرلەمان.

سەبارەت بە کۆبوونەوەکە نوعمان کورتوڵموش، سەرۆکی پەرلەمانی توركیا دەڵێت، كۆبونەوەی شاندەكە لەگەڵ ئۆجەلان ئەرێنی بووە و باس لە چەند پرسێکی گرنگ کراوە لەوانەش، هەڵوەشاندنەوەی پەکەکە و چەک داماڵینیان لە دوای بانگەوازی گروپی ئاشتی و کۆمەڵگای دیموکراتیک لە ٢٧ـی شوبات، هەروەها وەڵامدانەوەی پرسیارەکانی تایبەت بە جێبەجێکردنی رێککەوتنی ١٠ـی ئازاری نێوان هەسەدە و حکومەتی نوێی سوریا .

ئەم دیدارە دەرئەنجامی ئەرێنی هەبوو لە بوارەکانی یەکگرتنی کۆمەڵایەتی و بەهێزکردنی گیانی برایەتی و پێشخستنی پرۆسەکە بەرەو روانگەیەکی هەرێمایەتی.

هاوکات کاردانەوەی جیاوازیش هەبووە و رای جیاوازی لەسەر هەیە، گوڵستان کۆچیغیت سەبارەت بە سەردانەکە دەڵێت، زۆر ئەرێنی بووە
عەبدولڕەحمان ئاکسۆی کە یەکێکە لە دامەزرێنەرانی دەڤا، بەهۆی بەشدارینەکردنی پارتەکەی لە شاندەکەدا دەستی لە کار کێشایەوە و پارتی دەڤای تۆمەتبار کرد بەوەی خۆیان لە بەرپرسیارێتی دەدزنەوە.
 موساڤات دەرڤیشئۆغڵو، سەرۆکی ئیی پارتی، سەردانەکەی بە ناپاکی ناوبرد و گولتەکین ئویساڵ، سەرۆکی پارتی دیموکرات دژی چوونی شاندەکە بوو بۆ ئیمڕاڵی و پارتەکەی لە لیژنەکە کشاندەوە.

هاوکات، وابڕیارە رۆژی چوارشەممە شاندەکە بە ئامادەبوونی ٥١ یەک ئەندامی کۆمسیۆنەکە کۆنووسی کۆبوونەوەکەی ئیمراڵی لە کۆبوونەوەیەکدا بخوێننەوە.