نوێترین ڕاپۆرتی تەندروستی جیهانی پەردە لەسەر ڕاستییەکی تاڵ هەڵدەداتەوە کە چۆن گۆڕانکارییە جەستەییەکان خەریکە نەخشەی تەمەن لە وڵاتە گەورەکانی ئاسیا دەگۆڕن و ئامارەکان هەمووان تووشی شۆک دەکەن.

بەپێی توێژینەوەیەک کە لە گۆڤاری "Metabolism" بڵاوکراوەتەوە، هیندستان و چین لە لوتکەی وڵاتانی ناوچەی ئاسیا-پاسفیکدان بۆ بەرزترین ڕێژەی تووشبوون بە نەخۆشییە میتابۆلیزمەکان.

تەنها لە ساڵی ٢٠٢٣دا، هیندستان زیاتر لە ٢ ملیۆن گیانلەدەستدانی بەهۆی شەکرەی جۆری دووەم و بەرزبوونەوەی پەستانی خوێنەوە تۆمارکردووە، ئەمەش نیشانەی تێکچوونێکی قووڵە لە سیستەمی کۆگاکردن و بەکارهێنانی وزە لە جەستەی مرۆڤدا. پسپۆڕان هۆشداری دەدەن کە ئەم قەیرانە نەک تەنها کاریگەری لەسەر تەمەنی مرۆڤ هەیە، بەڵکو بارگرانییەکی ئابووری و تەندروستی گەورە بۆ ساڵانی داهاتوو دروست دەکات ئەگەر ڕێکاری خێرا نەگیرێتەبەر.

گۆڕانکارییە ژینگەییەکان و تێکچوونی شێوازی ژیانی مۆدێرن وەک هۆکاری سەرەکی ئەم هەڵکشانە مەترسیدارە دەستنیشانکراون کە پێویستی بە هۆشیارییەکی گشتی هەیە.

ڕێگاکانی چارەسەر و خۆپاراستن:

١. گۆڕینی سیستەمی خۆراک: کەمکردنەوەی شەکر، خوێ و چەورییە تێرەکان و زیادکردنی خواردنی سەوزە و میوە.
٢.چالاکی جەستەیی: ئەنجامدانی وەرزشی ڕۆژانە لانی کەم بۆ ماوەی ٣٠ خولەک بۆ ڕێکخستنی کێشی لەش و پەستانی خوێن.

٣. پشکنینی مانگانە: ئەنجامدانی پشکنینی بەردەوام بۆ ئاستی شەکر و کۆلیستڕۆڵ بۆ دەستنیشانکردنی پێشوەختەی هەر تێکچوونێک.

٤.دوورکەوتنەوە لە جگەرەکێشان: جگەرە و کهول کاریگەری ڕاستەوخۆیان لەسەر تێکچوونی میتابۆلیزم و سستی جگەر هەیە.