زۆرێک لە رۆژوان لە مانگی رەمەزاندا هەوڵدەدەن سوودە تەندروستییەکانی ڕۆژوو بەدەستبهێنن، بەڵام هەندێک خووی هەڵە لەکاتی بەربانگدا، نەک هەر سوودەکان ناهێڵن بەڵکو دەبنە هۆی کێشەی هەرەس، زیادبوونی کێش و هەستکردن بە تەمەڵی و بێهێزی.

لە ماڵپەڕی " eremnews" بڵاوکراوەتەوە، پسپۆڕانی تەندروستی جەختدەکەنەوە کە شێوازی شکاندنی ڕۆژوو و هەڵبژاردنی جۆری خواردنەکان، ڕۆڵی سەرەکییان هەیە لە پاراستنی هاوسەنگی جەستە دوای چەندین کاتژمێر لە برسییەتی.

دیارترین ئەو هەڵانەی دەبنە هۆی تێکدانی تەندروستیت:

١. خواردنی بڕێکی زۆر لە یەک کاتدا، ئەمە دەبێتە هۆی ماندووکردنی کۆئەندامی هەرەس و دروستبوونی غازات و ئاوسانی سک، باشتر وایە بە خورما و ئاو یان شۆربا دەستپێبکەیت و پاش کەمێک پشوو، ژەمە سەرەکییەکە بخۆیت.

٢. خواردنە سوورەکراوەکان یان چەورەکان چونکە هەستی تەمەڵی و خەواڵوویی زیاد دەکات و کاریگەری خراپی لەسەر تەندروستی دڵ و کێشی جەستە دەبێت.

٣. خواردنی ئەو شیرینییانەی ڕێژەیەکی زۆر شەکر و چەورییان تێدایە، دەبێتە هۆی بەرزبوونەوەی خێرای شەکری خوێن و پاشان هەستکردن بە ماندوێتی و برسییەتییەکی زۆر.

٤. خواردنەوە گازییەکان و شەربەتی دەستکرد لەجیاتی ئاو، کالۆرییەکی زۆر دەدات بە جەستە و نابێتە هۆی قەرەبووکردنەوەی ئەو ئاوەی جەستە لەدەستی داوە.

٥. نەخواردنی سەوزە و ڕیشاڵەکان دەبێتە هۆی قەبزی و ناڕێکی لە شەکری خوێندا.