توێژەران لە ژاپۆن پشتڕاستیان کردەوە کە تەنۆلکەی مایکرۆپلاستیکییان لە هەورەکاندا دۆزیوەتەوە، هەروەها دەڵێن بوونی ئەو ماددانە توانای گۆڕینی کەشوهەوای هەیە، ئەویش بەشێوەیەک کە هێشتا بە تەواوی نەزانراوە.

زاناکانی ژاپۆن چوونە سەر چیای فوجی و ئاویاما بۆ کۆکردنەوەی ئاوی باران کە لە هەورەکانی دەوروبەری لوتکەکانیانەوە دێنە خوارێ، توێژینەوەکەش لە گۆڤاری "Environmental Chemistry Letters" بڵاوکراوەتەوە.

هێرۆشی ئۆکۆشی، نووسەری سەرەکی توێژینەوەکە لە بەیاننامەیەکدا رایگەیاند "ئەگەر بە شێوەیەکی چالاکانە چارەسەری کێشەی پیسبوونی هەوای پلاستیکی نەکەین، گۆڕانکاری لە کەشوهەوا و مەترسییەکانی ژینگە رەنگە ببنە زیانێکی ژینگەیی راستەقینە و گەڕانەوەش ئەستەم بێت".

هەروەها ئەوەشی روونکردەوە، کاتێک مایکرۆپلاستیکەکان شی دەبنەوە، بڕێکی زۆر لە گاز ئازاد دەکەن و بەشدار دەبن لە گۆڕانی کەشوهەوا کاتێک دەگەنە بەشی سەرەوەی بەرگەهەوا.