شکۆی حکومەت لە گیرفانی بەتاڵی فەرمانبەر و
ماڵی تاریکی هاووڵاتییاندایە
PM:03:57:02/03/2026
764 جار خوێندراوەتەوە
گۆران دیبەگەیی
+
-
"حکومەتێک کە لە کاتی تەنگانەدا
سێبەری بەسەر هاووڵاتییەکانییەوە نەبێت، لە کاتی ئاساییدا بوونی تەنها بارگرانییە..
حکومەت لە "دیارنەمان" و میللەت
لە "تاریکیدا"؛ پرسیاری حەوت ملیۆن کەس ئەوەیە: سەرۆک حکومەت و جێگرەکەی
لە کوێن؟
لە کاتێکدا جیهان و ناوچەکە لەسەر سنگی
گڕکانێکی سیاسی و سەربازین، لە کاتێکدا چاویلکەی جەنگی نێوان ئێران و ئیسرائیل و
ئەمریکا سێبەری بەسەر هەموو ماڵێکی ئەم هەرێمەدا کێشاوە، سەیرترین دیاردەی سیاسی
لە کوردستان دەبینرێت: حکومەتێک کە تەنها لە کاتی وەرگرتنی باج و ڕسووماتدا هەیە،
بەڵام لە کاتی تەنگانە و قەیراندا وەک "بڵقی سەر ئاو" ون دەبێت.
پرسیاری هەرە جەوهەریی حەوت ملیۆن هاووڵاتیی
هەرێم لە ئێستادا ئەوەیە: سەرۆکی حکومەت و جێگرەکەی لە کوێن؟ لە هەموو دنیادا
کاتێک وڵات دەکەوێتە ناو قەیرانی دارایی یان مەترسیی جەنگ، سەرۆکەکان لەناو خەڵکدا
دەردەکەون، قسە بۆ میللەت دەکەن و دڵنیایی دەدەن؛ بەڵام لێرە، لە جیاتی ئەوەی
"سەرۆکایەتیی ئەنجومەنی وەزیرانی بەسەرچوو " بێن ژووری عەمەلیات بۆ
چارەسەری مووچە و کارەبا و پاراستنی ئاسایش دروست بکەن و خەڵک دڵنیا بکەنەوە، کەچی
خۆیان ون کردووە و کەس نازانێت لە کام کونج و قوژبنێکن!
بیرتانە لە ڕابردوودا حکومەتی بەسەرچوو سەری
زمان و بنی زمانی باسکردن بوو لە "شکۆ" و "قەوارە"؟ پرسیار
ئەوەیە: کام شکۆ؟
شکۆی فەرمانبەرێک کە دوای ۳٥ ساڵ خزمەت، دەبێت لەسەر سۆشیاڵ
میدیا بپاڕێتەوە بۆ مووچەکەی؟
شکۆی باوکێک کە لە ماڵە تاریکەکەیدا بەهۆی
نەبوونی کارەباوە، ناتوانێت چاو لە چاوی منداڵەکانی ببڕێت؟
ئەو شکۆیەی ئێوە باستان دەکرد لە
تەلەفزیۆنەکان و لێدوانە بریقەدارەکانتاندا، نەک هەر لەناو ماڵی ئەو حەوت ملیۆن
مرۆڤەی کە کردووتانن بە بارمتەی بێباکیتان نەماوە، بەڵکو هیچ تروسکایەکیش نابینرێت
کە لە داهاتوودا ڕۆژێک بێت ئێوە بەهۆش خۆتاندا بێنەوە.