AM:08:25:15/03/2026
804 جار خوێندراوەتەوە
وەزارەتی دەرەوەی عێراق رایگەیاند، "هەر هێرشێک رەتدەکەینەوە کە نوێنەرایەتییە دیپلۆماسی و کونسوڵگەرییەکان لە عێراق دەکاتە ئامانج، لێکۆڵینەوە لەو هێرشانە دەستیپێكردووە و رێوشوێنی پێویست دەگیرێتەبەر".
ئەمڕۆ یەکشەممە ١٥ـی ئازاری ٢٠٢٦، وەزارەتی دەرەوەی عێراق لە راگەیەندراوێکدا ئاماژەی بەوەکرد، بە توندی هەر هێرشێک رەتدەکەنەوە کە نوێنەرایەتییە دیپلۆماسی و کونسوڵگەرییەکان بکاتە ئامانج، کە لەسەر خاکی عێراق کاردەکەن، جەختی لەوەکردەوە حکومەتی عێراق پابەندە بۆ دەستەبەرکردنی ئاسایش و سەلامەتی سەرجەم نوێنەرایەتییە دیپلۆماسی و کونسوڵگەرییەکان و کارمەندەکانیان، بەپێی بڕگەکانی یاسا نێودەوڵەتییەکان و رێککەوتنە پەیوەندیدارەکان.
باسی لەوەشکرد،
لایەنە پەیوەندیدارەكان بە ڕێنمایی سەرۆک وەزیران دەستیان بە لێکۆڵینەوە کردووە لە
هەندێک لەو هێرشانەی کە نوێنەرایەتییە دیپلۆماسی و کونسوڵگەرییەکانیانی کردووەتە
ئامانج و ئەنجامی لێکۆڵینەوەکان دەخرێنە بەردەم دەسەڵاتە باڵاکان بۆ گرتنەبەری
رێوشوێنی یاسایی پێویست.
روونیکردەوە، بەردەوام
دەبن لە گرتنەبەری هەموو رێوشوێنێکی پێویست بۆ پاراستنی ئاسایش و سەقامگیری،
هەروەها حکومەت و هێزە ئەمنییەکان نەرمی نانوێنن بەرامبەر بە هیچ کردەوەیەکی
توندوتیژی یان هێرشێک کە نوێنەرایەتییە دیپلۆماسییەکان بکاتە ئامانج.
