خواردنی ماست لە کاتێکی دیاریکراودا دەتوانێت یارمەتی پرۆبایۆتیکەکان بدات کە بەرگەی ژینگەی سەختی گەدە بگرن و ئارەزووی خواردن رێکبخەن و تەندروستی ئێسکەکان بەرەوپێش ببەن کاتێک لەگەڵ وەرزشکردندا تێکەڵ دەکرێت.

تێگەیشتن لە باشترین کاتەکان بۆ تێکەڵکردنی ماست لە رۆتینی رۆژانەتدا دەتوانێت یارمەتیت بدات بۆ وەرگرتنی زۆرترین سوودی.

ماست دەوڵەمەندە بە پرۆبایۆتیک و بەکتریا بەسوودەکان کە پێویستن بۆ تەندروستی ریخۆڵە، توێژینەوەکان باس لەوە دەکەن کە خواردنی ماست ٣٠ خولەک پێش یان لەگەڵ ژەمێکدا یارمەتی زیاتری بەکتریا سوودبەخشەکان دەدەن چونکە ترشی گەدە لەم کاتانەدا رێگە بە پرۆبایۆتیکەکان دەدات بە شێوەیەکی کاراتر کار بکەن.

بە پێچەوانەوە خواردنی ماست ٣٠ خولەک دوای ژەمێک رەنگە سوودەکانی بۆ ریخۆڵەکان سنووردار بکات، چونکە زیادبوونی ترشی گەدە لە کاتی هەرسکردندا دەتوانێت زۆرێک لە پرۆبایۆتیکەکان لەناو ببات پێش ئەوەی بگاتە ریخۆڵەکان، بۆ ئەوەی ئەنجامێکی باشی هەبێت، باشترە پێش یان لەگەڵ ژەمەکاندا ماست بخورێت بۆ ئەوەی زۆرترین کاریگەری ئەرێنی لەسەر تەندروستی ریخۆڵە هەبێت.

خواردنی ماست لە کاتی گونجاودا دەتوانێت یارمەتیدەر بێت لە بەڕێوەبردنی کێشدا، ئەمەش بە شێوەیەکی بەرچاو بەهۆی رێژەی پرۆتین و کالیسیۆمەوەیە، کە دەبێتە هۆی تێربوون و ڕێگری لە زیادەڕۆیی لە خواردن دەکات، باشترین کاتیش بۆ خواردنی ماست بۆ دابەزاندنی کێش نێوان ژەمەکاندا بۆ سنووردارکردنی برسێتی.

ماست سەرچاوەیەکی نایابی کالیسیۆم و پرۆتین و ڤیتامینDو پرۆبایۆتیکەکانە کە هەموو ئەمانە پاڵپشتی تەندروستی ئێسک دەکەن، خواردنی بەردەوامی پەیوەندی بە باشتربوونی چڕی کانزاکانی ئێسکەوە هەیە، ئەمەش مەترسی تووشبوون بە پووکانەوەی ئێسک کەمدەکاتەوە، هەموو رۆژێک خواردنی ماست لە هەمان کاتدا جا لەگەڵ نانی بەیانی بێت یان وەک خواردنێکی کەمی پاشنیوەڕۆ، یارمەتیدەرە بۆ دامەزراندنی خوویەکی تەندروست کە بەشدارە لە باشترکردنی تەندروستی ئێسک، هەروەها خواردنی ماست دوای وەرزشکردن هێزی ئێسک زیاد دەکات.