وتیشی، دەبێت ئەو بانکەی ئۆتۆمبێل یان خانو بۆ کەسێک دەکرێت نابێت قازانجەکەی سنورێک تێبپەڕێنێت ببێتە هۆی هەلقۆستنەوە "ئیستیغلالکردنی ئەو کەسەی ئۆتۆمبێلەکە یان خانووەکەی بۆ دەکڕێت".

دەشڵێت، قازانجی گونجاو لە عورفی ئیسلامیدا تا ١٠٪ دروستە، جا بۆ ساڵێک بێت یان ١٠ ساڵ.

لەبارەی وەرگرتنی قەرزی شێرپەنجەوە، ئەمینداری گشتی یەکێتی زانایانی موسوڵمانی جیهانی ئاماژەی بەوەدا، دورستە نەخۆش قەرزی شێرپەنجە لە حکومەت وەربگرێت، چونکە دۆخێکی ناچارییە و ئەگەر نەخۆش ئەو قەرزە وەرنەگرێت دەمرێت و جەستە و تەندروستی مرۆڤ گرنگە و ئاساییە لە پێناویاندا گوناهێک بکرێت.

لەبارەی قەرزی خانوبەرە ئەوەشی خستەڕوو، قەرزی خانوبەرە لە بانکەکانی عێراق دروستە، چونکە پەیوەندی نێوان هاوڵاتییەکە و ئەو بانکەی قەرزەکەی پێدەدات راستەوخۆیە و بانکی ناوەندی تەنها نێوەندگیرە و رێژەی زیادکردنەکەی ٥٪ـە بۆ ٢٠ ساڵ و بڕێکی زۆر کەمە و رەمزییە هیچ کاریگەرییەکی نیە.

وتیشی، خۆزگە بانکەکانی هەرێمیش بەو جۆرە هاوکاری هاوڵاتیانی دەکرد و ئەوانیش وەک زانایانی ئاینی هاوکاریان دەکردن لەبارەی حەڵاڵ بوونی قەرزەکانیان.

لەبارەی زەکاتیشەوە ئەوەی خستەڕوو، حکومەت لە هەموو وڵاتێکدا سەرکردەیە و پێویستە حکومەت لیژنەیەکی سەربەخۆ دروستبکات کە سەر بەحکومەت نەبێت، بەڵام لەلایەن حکومەتەوە چاودێری بکرێت زەکات کۆبکاتەوە و دابەشی بکات و بەشێوەیەکی گونجاو تاوەکو هەژاران سودی لێوەربگرن.

عەلی قەرەداغی ئەوەشی ئاشکرا کرد، لەگەڵ مەسعود بارزانی سەرۆکی پارتی کۆبووەتەوە و پێی راگەیاندووە، گونجاو نیە بەرمیلێک نەوت لە هەرێم بە ١٠٣ هەزار دیناربێت و لە عێراق بە ٣٠ هەزار دیناربێت.

لەبارەی دۆخی سیاسی هەرێمەوە، عەلی قەرەداغی ئاشکرای کرد، هەموو کات هەوڵیداوە لایەنە سایاسییەکان کۆ بکاتەوە. وتیشی، دۆخی سیاسی هەرێم لە ئێستادا باش نییە.

لەبارەی ئەگەری جەنگی ناوخۆییەوە، ئەمینداری گشتی یەکێتی زانایانی موسوڵمانی جیهانی باسی لەوەکرد، جەنگی ناوخۆیی دروست نابێت، چونکە هاوڵاتییانی هەرێم بەرگەی جەنگ ناگرن.

دەشڵێت، بە لایەنە سیاسییەکانی راگەیاندووە، ئەگەر دۆخی هەرێم بەم جۆرەبێت گومانی هەیە هاوڵاتیان پشتی بەغدا بگرن و پشت لە هەرێم بکەن.

لەبارەی کاریگەرییەکانی بۆ کەمکردنەوەی بۆردوومانەکانی تورکیا بۆ سەر سنورەکانی هەرێم لەرێگەی پەیوەندییەکانی لەگەڵ رەجەب تەیب ئەردۆغان سەرۆکی توکیاوە، عەلی قەرەداغی ئاماژەی بەوەدا، لە بابەتی ویست و بەرژەوەندی وڵاتێکی وەک تورکیادا ئەو وڵاتە گوێ بە داواکاری و گلەیی کەسایەتییەک نادەن ئیتر ئەو کەسایەتییە هەر کەسێک بێت.

وتیشی، ئەردۆغان تاکە کەس نیە بڕیاری ئەو هێرشانە دەدات.

باسی لەوەشکرد، چەندان جار هەوڵیداوە ئەو کێشانە چارەسەر بکەن، بەڵام لایەنە کوردییەکانیش هیچ ئاسانکارییەک ناکەن.

ئاماژەی بەوەشکرد، وەک یەکێتی زانایان و عەلی قەرەداغی دژی هەموو کارێکە کە نا دادپەروەری بێت و لە کاتی بۆردوومانەکاندا هەموو کات راگەیەندراویان هەیە.

ئەوەشی خستەڕوو، زۆربەی ئەو لانەیانەی تۆمەتباری دەکەن بە بێ هەڵوێستی، لە کاتی تردا داوای هاوکاری لێدەکەن.

گەلانی جیهان شانازی بە مێژووی کوردەوە دەکەن، بەڵام گەلی کورد نەیتوانیوە سود لە مێژووەکەی وەربگرێت.

دەشڵێت، چەندان جار پێشنیاری بۆ سەرکردایەتی کورد کردووە کۆنفڕانسێکی جیهانی لە گوندەکەی "سەڵاحەدینی ئەیوبی" سازبکەن تاوەکو کورد بوونی ئەو سەرکردیە بە جیهان بناسێندرێت، بەڵام نەکراوە.