ماست پڕە لە ماددە خۆراکیەکان کە پشتگیری تەندروستی ڕیخۆڵە دەکەن، یارمەتی بەڕێوەبردنی کێش دەدەن و ئێسکەکان بەهێز دەکەن.

بەپێی ڕاپۆرتێکی ماڵپەڕی "Healthline"ماست لە شیری چەورکراو دروستکراوە و پرۆبایۆتیک و کالیسیۆم و پرۆتین و ڤیتامینەکانی تێدایە، چەندین سوودی تەندروستی پێشکەش دەکات کاتێک بە بەردەوامی دەخورێت، کاتی خواردنی ماستیش کاریگەری لەسەر جەستەت دەبێت.

خواردنی ماست لە کاتێکی دیاریکراودا دەتوانێت یارمەتی پرۆبایۆتیکەکان بدات کە بەرگەی ژینگەی سەختی گەدە بگرن و ئارەزووی خواردن ڕێکبخەن و تەندروستی ئێسکەکان بەرەوپێش ببەن کاتێک لەگەڵ وەرزشکردندا تێکەڵ دەکرێت.

تێگەیشتن لە باشترین کاتەکان بۆ تێکەڵکردنی ماست لە ڕۆتینی ڕۆژانەتدا دەتوانێت یارمەتیت بدات بۆ وەرگرتنی زۆرترین سوودی.

ماست دەوڵەمەندە بە پرۆبایۆتیک و بەکتریا بەسوودەکان کە پێویستن بۆ تەندروستی ریخۆڵە، توێژینەوەکان باس لەوە دەکەن کە خواردنی ماست ٣٠ خولەک پێش یان لەگەڵ ژەمێکدا یارمەتی زیاتری بەکتریا سوودبەخشەکان دەدەن چونکە ترشی گەدە لەم کاتانەدا ڕێگە بە پرۆبایۆتیکەکان دەدات بە شێوەیەکی کاراتر کار بکەن.

بە پێچەوانەوە خواردنی ماست ٣٠ خولەک دوای ژەمێک ڕەنگە سوودەکانی بۆ ڕیخۆڵەکان سنووردار بکات، چونکە زیادبوونی ترشی گەدە لە کاتی هەرسکردندا دەتوانێت زۆرێک لە پرۆبایۆتیکەکان لەناو ببات پێش ئەوەی بگاتە ڕیخۆڵەکان، بۆ ئەوەی ئەنجامێکی باشی هەبێت، باشترە پێش یان لەگەڵ ژەمەکاندا ماست بخورێت بۆ ئەوەی زۆرترین کاریگەری ئەرێنی لەسەر تەندروستی ڕیخۆڵە هەبێت.

خواردنی ماست لە کاتی گونجاودا دەتوانێت یارمەتیدەر بێت لە بەڕێوەبردنی کێشدا، ئەمەش بە شێوەیەکی بەرچاو بەهۆی ڕێژەی پرۆتین و کالیسیۆمەوەیە، کە دەبێتە هۆی تێربوون و ڕێگری لە زیادەڕۆیی لە خواردن دەکات، باشترین کاتیش بۆ خواردنی ماست بۆ دابەزاندنی کێش نێوان ژەمەکاندا بۆ سنووردارکردنی برسێتی.

ماست سەرچاوەیەکی نایابی کالیسیۆم و پرۆتین و ڤیتامین D و پرۆبایۆتیکەکانە کە هەموو ئەمانە پاڵپشتی تەندروستی ئێسک دەکەن، خواردنی بەردەوامی پەیوەندی بە باشتربوونی چڕی کانزاکانی ئێسکەوە هەیە، ئەمەش مەترسی تووشبوون بە پووکانەوەی ئێسک کەمدەکاتەوە، هەموو ڕۆژێک خواردنی ماست لە هەمان کاتدا جا لەگەڵ نانی بەیانی بێت یان وەک خواردنێکی کەمی پاشنیوەڕۆ، یارمەتیدەرە بۆ دامەزراندنی خوویەکی تەندروست کە بەشدارە لە باشترکردنی تەندروستی ئێسک، هەروەها خواردنی ماست دوای وەرزشکردن هێزی ئێسک زیاد دەکات.