ئەمڕۆ٢٤١ـەمین ساڵیادی دامەزراندنی شاری سلێمانییە و هاوڵاتیانی شارەکەش ساڵانە یادی دامەزراندنی دەکەنەوە.

هەموو ساڵێک لە ١٤ی تشرینی دووەمدا یادی دامەزراندنی شاری سلێمانی دەکرێتەوە، لەو رۆژەدا خەڵکی بە جلی کوردیی و ئاهەنگ و گۆرانییەوە ئەو یادە دەکەنەوە.

مێژووی دروستبوونی دەگەڕێتەوە بۆ ئیبراھیم پاشای بابان کە لە ساڵی ١٧٨٣ فەرمانڕەوایی گرتە ئەستۆ و دەستیکرد بە دروستکردنی شاری سلێمانی تا لە ساڵی ١٧٨٤ دروستکردنی شاری سلێمانی کۆتایی ھات و بە ناوی باوکییەوە، "سلێمان پاشا" ناوی لێنا سلێمانی.

سلێمانی جگه‌ له‌‌وه‌ی لەو کاتەدا ده‌بێته‌ پایته‌ختی میرنشینی بابان له‌هه‌مانكاتدا ده‌بێته‌ مه‌ڵبه‌ندێكی بازرگانی و رۆشنبیری ناوچه‌كه. لە سلێمانیدا شێوەزاری سۆرانی په‌رەی‌ ‌سەندووە و بووەتە زمانی خوێندن و نووسین، کە دواتر شێوەزاری گۆران له‌ناوچه‌كه‌دا به‌ره‌و كه‌مبوون و نه‌مان رۆیشت.

سلێمانی لانکەی تێدا هەڵکەوتن و گەشەسەندنی چەندین مەلا و زانا و سیاسی و نووسەر و شاعیر و هونەرمەند و وەرزشکار بووە و هەر لە کۆنەوە جۆرە جیاوازەکانی هونەر تیایدا پەرەی سەندووە و چەندین رۆژنامە و رادیۆ و تەلەفزیۆن لە شارەکەدا دامەزراون و پەرەیان سەندووە، هەر لەوێ لەلایەن سێ کوچکەی بابانەوە(نالی، سالم و کوردی) قوتابخانەی شیعری بابانیان دروست کردووە و تا ئێستاش شێوازی ئەدەبیاتی کوردی بەرەوپێشچوونی جۆری ئەو ئەدەبەیە کە ئەوان دروستیان کردووە.