گەرمیان و بازیان..خێریان بۆ هەمووان..باجیش لەسەر خۆیان!!

1016 جار خوێندراوەتەوە

چەمچەماڵ و گەرمیان بە غاز و نەوت دەوڵەمەندن و بەهۆیەوە کارەبای سەرتاپای کوردستان و بگرە بەشێکی عێراقیش دابیندەکرێت؛ بەڵام خەڵکی چەمچەماڵ و شۆڕش و گەرمیان بەگشتی تەنانەت ئاوی پاکی خواردنەوەشیان نییە و رێگاوبانی باشیان نییە و زۆربەی گەنجەکانی بێ کارن!! زۆربەی قوربانیانی جینۆسایدی ئەنفال خەڵکی گەرمیانن، بەڵام ئایا دوای زیاتر لە۳٤ ساڵ لەفەرمانڕەوایی دەسەڵاتی کورد و حکومەتی هەرێم، چی کراوە بۆ کەسوکاری ئەنفالەکان و تا ئێستا چەند مستەشار و سەرۆک جاش--ئەوانەی بەبڕیاری دادگای باڵای تاوانەکانی عێراق فەرمانی دەستگیرکردنیان هەیە-- لەکوردستان دەستگیرکراون؟! یان ئێستا نەوە و کوڕ وکچەکانیان پەرلەمانتار و بەرپرسن تا لە هەرێم و بەغدا بەرگریی لەمافەکانی کەسوکاری ئەنفالکراوان و کیمیابارانی هەڵەبجەو خەڵکی کوردستان بکەن!! قەزای بازیان، بە پێکهاتەی جیۆلۆجی بەرد و خاکەکەی باشترینە بۆ دروستکردنی چیمەنتۆ. لە ئێستادا پێنج کارگەی گەورەی چیمەنتۆ لەسنوری قەزاکە هەیە، و ژمارەکە بەرەو زیادبوونیش دەڕوات. ساڵانە هەزاران کەسی ناوچەکە بەهۆی تۆز و ژەهری ئەو کارگانە و،کارگەکانی شیش و پۆڵاوە، تووشی نەخۆشی شێرپەنجە و تەنگەنەفەسی دەبن. بەڵام کوا چی بۆ خەڵکی بازیان کراوە؟ ئایا ئەو کارگانە هیچ هاوکارییەکی سندوقی تووشبوانی شێرپەنجە و نەخۆشخانەی هیوادەکەن؟ بازیان چەند ساڵێکە، بەتایبەت ئەو گوند و ناوچانەی هێشتا دوکەڵ و ژەهر و تەپوتۆزی سەرمایەدارەکان و کارگەکانیان نەیخنکاندوون، برەوێکی باشی چالاکی کشتوکاڵی و باخداریی بەخۆیەوە بینیوەو بووەتە سەبەتەیەکی باشی خۆراک بۆ شاری سلێمانی.

سەرەڕای ئەوەی جوتیاران و خاوەن خانووە پلاستیکیەکان دەڵێن حکومەتی هەرێم هیچ هاوکارییەکان ناکات و بگرە ڕۆژبەڕۆژ مەرج و کرێی کارەبایان لەسەر زیاد دەکات و مەرجەکانی دەرهێنانی ئاوی ژێرزەوی زۆر قورسترکردووە!! لەجیاتی ئەوەی کارئاسانی بۆ جوتیارانمان بکرێت و هاوکارییان بکرێت و مەرج و رێوشوێنەکانیان لەسەر ئاسان بکرێت، وا خەریکە ئیتر ئەو هێندە سەوزایی و کشتوکاڵەی ماوە ئەویش ریشەکێش دەکرێت. ئایا کوردستان پێویستی بە کارگەی زیاتری چیمەنتۆیە یان دابینکردنی ئاسایشی خۆراکی؟ پێشبینی دەکرێت لەماوەی دە ساڵی داهاتوودا سنوری شاری سلێمانی درێژببێتەوە هەتا بناری شاخی بەرانان ، بەتایبەت دوای تەواوبوونی شاڕێی بابان و کشانی شار بەرەو باشوور، ئایا پسپۆڕان و دڵسۆزانی ئەم شارە و دەسەڵاتدارەکانی بیریان لەو کارەساتە مرۆیی و ژینگەییانە نەکردووەتەوە کەلەماوەی چەند ساڵی ئایندەدا روودەدەن کاتێ سنوری دووریی کارگەکانی چیمەنتۆی بازیان و شاری سلێمانی تەنها چەند کیلۆمەترێک و شاخی بەرانان دەبێت؟!شاخی بەرانان کە چەند ساڵێکە کۆمپانیاکانی چیمەنتۆ کەوتوونەتە دڕینی ناخ و هەناوی به دەمی شۆفڵ و بەردشکێنەکانیان، ئایا ئەو کۆمپانیایانە لەبەرامبەر ئەو قازانجە بێ شومارەی دەیکەن و ئەو ئاستە بەرزەی هەواو خاک و ئاوی کورستان پیس دەکەن، چی بەشدارییەکیان هەبووە لە ئەنجامدانی پڕۆژە بۆ قازانجی گشتی و ژێرخانی تەندروستی و پەروەردە و ڕۆشبیریی و دروستکردنی پارک و سەوزایی ؟!