بێ هیوایی، بەڵام تروسکەی ئومێد!

488 جار خوێندراوەتەوە

ساڵانێکە بە هۆی تاڵانکاری و نادادیی و رێگرتن لە ئازادی رادەربڕین و بەرتەسککردنەوەی ئازادییەکانی شەخسییەوە، خەڵکی بەشمەینەتی هەرێمی کوردستان، تووشی نائومێدییەکی ئاسۆلێڵ بووە.

هەرچەند چوار ساڵ جارێک هەڵبژاردن چ لە ناوخۆی کوردستان و چ بۆ حکومەتی ناوەندی ئێراق، ئەنجام ئەدرێ، وەلێ ئەو گەمە سیاسییە وەکی سیحری جادووگەر بەسەر خاوەنەکەیدا هەڵگەڕاوەتەوە و حکومەتی هەرێمی کردووەتە مەلەوانە درۆزنەکە و کەس بڕوا بە بەڵێن و پلانە خەیاڵاوییەکانی ناکا.

ئەو بارودۆخە وای کردووە گەنجان بە لێشاو ڕوو لە هەندەران بکەن و چینوتوێژەکانی دیکەیش هەوری بێهیوایی باڵ بەسەر دیدگە و ئایندەبینییاندا بکێشێ.

بەڵام هەروەک لای هەمووان ڕوونە، هەمیشە ترووسکایی ئومێدێ ئەبێتە مەشخەڵی ڕێ و بەرچاوی خەڵک و جەماوەر ڕۆشن ئەکاتەوە.

ئەوەی لە سیستمی سیاسیدا پێی ئەوترێ: ئۆپۆزیسۆنی کارا، وەکی ڕێنیشاندەرێ ئەکەوێتە پێش جەماوەر و ئەبێتە بڵندگۆی جاڕدانی ماف و داواکارییە ڕەواکانیان.

خۆشبەتانە لە هەرێمەکەی ئێمەیشدا جووڵانەوەیەکی وەکوو (نەوەی نوێ) ئیمڕۆکە بووە بە جێگەی ئومێدی سەتانهەزار هاوڵاتی و نەشتەری ڕەخنەی لە دەسەڵاتی گەندەڵ و نووکی ڕمی لە دژی تاڵانکاری و بەهەدەردانی سامانی نەوەکان، تیژکردووە.

تاکە هێزێ کە بتوانێ ترووسکایی ئومێد لەم بارە نالەبارە تاریکەدا بگەڕێنێتەوە، مەگەر هەر مۆم و گڵۆپەکەی ئەوبێ.

بۆیە پێویستە هەمووان لەم کاتی بانگەشەی هەڵبژاردنەدا، ڕوو لە ساباتی ئەو بکەن و بەڵێنی سەرخستن و پاڵپشتیکردنی بدەن.

بۆیێ باشترین ئامرازێک بۆ چارەسەری ئەو ناڕێکی و ستەمە سیاسییە بەشداریکردنە لە پرۆسەی دەنگدان و تاقیکردنەوەی هێزێکی نوێیە، کە بەڵکو بتوانێ جوداوازییەک لەشێوەی ئیدارەداندا بهێنێتە گۆڕێ و دەموچاوی نوێ بهێنێتە مەیدانی خزمەتکردن و کاری پەرلەمانتاری.

ئەوەی زانراوە، بایکۆت و بێ هەڵویستی و سستی لە بەشداریکردن، تەنیا لەبەرژەوەندی دەسەڵاتدارانی ئێستا و حکومڕانی هەرێمدایە.

هەروەک گۆڕانکاری سیاسی لە ڕێگەی سندوقی دەنگدانەوە، تاکە ڕێگەی دیموکراسی سەرکەوتووە و باشترین ئامرازی مەدەنییە بۆ گۆڕانکاری ڕاستەقینە.

سابەڵکو خۆری هیوا بۆ جارێکی دی، بەسەر کوردستانەکەماندا تیشکی بگەشێتەوە و ئومێد بۆ هەمووان بگەڕێتەوە.