دەشڵێت،گەندەڵی و قۆرخکاری و بەرتەسککردنەوەی ئازادییەکان بۆتە سیمای دیاری ئەم دەسەڵاتە.

سەرۆکی فراکسیۆنی نەوەی نوێ باسی لەوەشکردووە، سەروەت و سامانی ئەم میلەتە دەچێتە گیرفانی دوو بنەماڵەی حوکمڕانەوە و هیچ ئاسۆیەکی باشتربوونی ئیدارەدان بەدی ناکرێت.

ئەوەشی خستووەتەڕوو، چارەنوسی ئەم وڵاتە لەبەردەستی پارتی و یەکێتی بەرەو ئایندەیەکی مەترسیدار هەنگاو دەنێت بەجۆرێک بێزاری خەڵک گەیشتووەتە رادەیەک دوور نییە لەئایندەیەکی نزیکدا وەک بورکانێکی ئاگرین بتەقێتەوە و گڕبگرێت و تەڕو وشک بەیەکەوە بسوتێنێت.

دەشڵێت، "پێویستە ئەم دەسەڵاتە لێرەدا بوەستێنرێت و هەرچی زووە هەمووان بەیەکەوە بیربکەینەوە و هەنگاو بنێین بۆ رزگارکردنی ئەم هەرێمە لەو دەسەڵاتە خۆسەپێن و گەندەڵ و ستەمکارە کەباکی بەهیچ شتێک نیە."

ئەمە لەکاتێکدایە، لەماوەی رابردوودا نرخی سوتەمەنی، بەنزین و نەوت و غاز بەشێوەیەکی بەرچاو بەرزبووەتەوە. هەروەها، نرخی خواردن و پێداویسییەکان لەبازاڕەکانی هەرێمدا بەرزبوونەتەوە، سەرەڕای ئەوەی بەرزبوونەوەی نرخی ئارد و غاز خاوەن نانەواکانی ناچارکرد گردبوونەوە بکەن و هۆشداری لەبارەی داخستنی نانەواکانیاوە دەدەن.

لەلایەکی دیکەوە، بەهۆی نەدانی موچەی مامۆستایان و فەرمانبەران و ژینگەپارێزانەوە رۆژانە توێژە جیاجیاکانی وڵات بەردەوامن لە بایکۆت کردن و خۆپیشاندان. لەلایەکی دیکەوە هاوڵاتییان گلەیییان لە بەرزبوونەوەی نرخی کارەبا و ئاو و پارەی پێوەری زیرەک هەیە. خزمەتگوزارییەکانی و رێگەو بان و تەندروستی و پەروەردە و سەرجەم کەرتەکانی دیکە لەهەرێمدا دوای ٣١ ساڵ لە حکومڕانی یەکێتی و پارتی رۆژبەڕۆژلە پاشەکشەدایە. ئەمەش لەکاتێکدایە نرخی یەک بەرمیل نەوتی خاو لە بازاڕەکانی جیهاندا ١١٢ دۆلاری تێپەڕاندووە