بەپێی بڕیارە نوێیەکانی لیژنەی ئەمنی، تایبەت بە ناوچە گەشتیارییەکانی بان قۆین و شەمێران، هاوڵاتییان و گەشتیاران تەنها تاوەکو کاتژمێر پێنجی ئێوارە دەتوانن بە ئاراستەی رێگای بەنداوی دەربەندیخان و ناوچە گەشتیارییەکان هاتووچۆ بکەن، بەڵام لە دوای ئەو کاتژمێرەوە ئاراستەی هاتووچۆ دەگۆڕێت و تەنها رێگە بە گەڕانەوە بەرەو ناو سەنتەری دەربەندیخان دەدرێت، هاوکات بڕیاریش دراوە کە بە هیچ شێوەیەک رێگا بە ئۆتۆمبێلی بارهەڵگر و ماتۆڕسکیل نەدرێت بچنە ناو ناوچە گەشتیارییەکان و هەر کەسێک سەرپێچی بکات ڕووبەڕووی یاسا دەکرێتەوە.

لە بەشێکی دیکەی رێکارەکاندا، پۆلیسی دارستان و بەرگری شارستانی راسپێردراون بۆ چاودێریکردنی وردی ئەو بەلەمانەی لە ناو دەریاچەی دەربەندیخاندا گەشتیاران دەگوازنەوە، بە جۆرێک هەر بەلەمێک مەرجی گەشتیاری و سەلامەتی تێدا نەبێت رێگری لێدەکرێت، لە هەمان کاتدا هێزەکانی ئاسایش و پۆلیس و هاتووچۆ و هێزەکانی فەوجی سێی بەرگری فریاکەوتن لە هەماهەنگی بەردەوامدا دەبن بۆ پاراستنی ئاسایشی هاوڵاتییان و دابینکردنی کەشێکی ئارامی بەهارانە بۆ هەموو ئەو کەسانەی لەم یادانەدا روو لە ناوچەکە دەکەن.