سەرۆک کۆماری عێراق، بە بۆنەی هاتنی جەژنی رەمەزانەوە پەیامێکی بڵاوکردەوە و رایگەیاند، گەرمترین پیرۆزبایی ئاراستەی گەلی عێراق و تەواوی موسڵمانانی جیهان دەکات.
ئەمڕۆ هەینی ٢٠ـی ئازاری ٢٠٢٦، لەتیف رەشید، سەرۆک کۆماری عێراق لە پەیامێکدا، هیوای خواستووە ئەم جەژنە ببێتە مایەی خێر و بەرەکەت بۆ عێراق و وڵاتانی ئیسلامی و داواشی لە خوای گەورە کردووە، کە ئاشتی و تەبایی بەسەر ناوچەکەدا بکێشێت.
لە بەشێکی تری
پەیامەکەیدا، سەرۆک کۆمار ئاماژەی بەوە کرد، کە جەژنی ئەمساڵ لە کاتێکدایە ناوچەکە
بە رەوشێکی نائاسایی و گرژییەکی زۆردا تێدەپەڕێت، کە کاریگەری نەرێنییان لەسەر
ئاسایش و سەقامگیری گەلان دروست کردووە.
ئاماژەی بەوەشکردووە،
ئەم رەوشە وا دەخوازێت هەمووان کار بۆ پاراستنی یەکڕیزی نیشتمانی و بەهێزکردنی گیانی
هاوکاری و کارکردنی بەکۆمەڵ بکەن، تاوەکو بتوانرێت بەسەر ئاڵنگارییەکاندا زاڵ بن و
سەلامەتی هاوڵاتیان بپارێزرێت.
هاوکات هیواشی
خواست ململانێ و گرژییەکان کۆتایییان بێت و ئاشتی باڵ بەسەر ناوچەکەدا بکێشێت، تاوەکو
هەموو گەلان بتوانن لە کەشێکی پڕ لە ئاسایش و گەشەسەندندا بژین.