بۆری نەوتی کەرکوک - جەیهان لە توانایدایە لە رۆژێکدا ٥٠٠ هەزار بۆ زیاتر لە یەک ملیۆن بەرمیل نەوت هەناردە بکات و حکومەتی عێراقیش لە هەوڵی چاکردنیدایەتی و پێشبینی دەکرێت لە سەرەتاوە رۆژانە ٣٠٠ هەزار بەرمیل نەوتی تێدا تێبپەڕێت.

یەکێکی دیکە لە بۆرییەکانی عێراق هێڵی بۆری نەوتی بەسرە عەقەبەیە، کە درێژییەکەی نزیکەی هەزار و ٧٠٠ کیلۆمەترە و لە کێڵگە نەوتییەکانی رومەیلەوە دەست پێدەکات تاوەکوبەندەری عەقەبە لە ئوردن، ئەم بۆرییە لە سەرەتای هەشتاکانی سەدەی رابردوەوە پلانی دروستکردنی دانراوە و توانای هەیە رۆژانە یەک ملیۆن بۆ دوو ملیۆن و ٢٥٠ هەزار بەرمیل نەوت پێیدا تێپەڕببێت.

بۆرییەکی دیکەی نەوتی عێراق بۆری نەوتی کەرکوک - سوریایە کە ئەم هێڵی بۆری نەوتە لە ناو سوریا دابەش دەبێت بۆ دوو بەندەری جیاواز کە بانیاس و تریمپۆڵییە و درێژی ئەم بۆریە نزیکەی ٨٠٠ کیلۆمەترە، بۆری نەوتی کەرکوک - سوریا لە ساڵی ١٩٥٢ دەست بە دروستکردنی کراوە و توانای گواستنەوەی تا ٣٠٠ هەزار بەرمیل نەوتی هەیە.

بۆرییەکی دیکەی عێراق هێڵی بۆری نەوتی بەسرە - دەریای سوورە و ئەم پرۆژەیە لە ساڵی ١٩٨٦ دروستکراوە و تەنها یەک ساڵ کاری کردووە و حکومەتی عێراق وەک جێگرەوەی گەرووی هومرز دروستیکرد، ئەم بۆریە نەوتە درێژییەکەی هەزار و ٢٠٠ کیلۆمەترە و توانای گواستنەوەی نزیکەی یەک ملیۆن و ٦٥٠ هەزار بەرمیل نەوتی هەیە، بۆرییەکە لە ناوچەی زوبەیر لە بەسرە دەست پێدەکات و بە سعودیەدا تێدەپەڕێت و دەگاتە تێرمیناڵی موعاجیز لە شاری یانبو لەسەر دەریای سوور.