لە کۆنگرەیەکى رۆژنامەوانیدا کە لە دیوانى وەزارەتى خوێندنى باڵاى عێراق لە بەغدا بەڕێوەچوو، ئەنجامی وەرگرتنی قوتابییانی هەرێمى کوردستان لە زانکۆکانی ناوەڕاست و باشوورى عێراق، هەروەها ئەنجامى وەرگرتنى قوتابییانی ناوەڕاست و باشوورى عێراق لە زانکۆکانى هەرێمى کوردستان راگەیەندران.

بە پێی راگەیەندراوی خوێنی باڵای هەرێم لە ئەنجامى هەماهەنگیی نێوان هەردوو وەزارەتی خوێندنی باڵای هەرێم و عێراق، لە کۆی ١٢٧ قوتابیی هەرێمی کوردستان کە داواکارییان پێشکەش کردبوو، ١٠٥ـیان لە زانکۆکانی ناوەڕاست و باشووری عێراق وەرگیران، هەروەها لە کۆی هەزار و ٦٥٧ قوتابیی ناوەڕاست و باشوورى عێراق کە داواکارییان پێشکەش کردبوو، ٦٢٣ـیان لە زانکۆکانی هەرێمی کوردستان وەرگیران.

دەشڵێت، لە ئێستاوە سەرجەم وەرگیراوان پێویستە پەیوەندى بەو کۆلێژ و بەشانەوە بکەن کە ناویان لێ گەڕاوەتەوە بە مەبەستى دەستکردن بە مامەڵەى وەرگرتن.

دەرچووانى ١٢ـی ئامادەیی هەرێمى کوردستان لە رێگەی ئەم لینکەوە دەتوانن شوێنى وەرگرتنیان لە زانکۆ و پەیمانگەکانى ناوەراست و باشوورى عێراق بدۆزنەوە.

هەروەها دەرچووانى پۆلی ١٢ـی ئامادەیی ناوەڕاست و باشوورى عێراق لە رێگەی ئەم لینکەوە دەتوانن شوێنى وەرگرتنیان لە زانکۆ و پەیمانگەکانى هەرێمى کوردستان بدۆزنەوە.