سەرۆکێ ئەمریکا: پشتەڤانیا ئەنجامدانا هەلبژارتنا پەرلەمانێ کوردستانێ دکەین

AM:08:32:16/04/2024

456 جار خوێندراوەتەوە

+ -

بۆ ئێکەمجار د هەیاما 32 سالێن دەربازبووی دا سەرۆکێ ئەمریکا تەکەزیێ لسەر ئەنجامدانا هەلبژارتنا پەرلەمانێ کوردستانێ بکەت و ڕاگەهاند، پشتەڤانیا ئەنجامدانا هەلبژارتنا پەرلەمانێ کوردستانێ دکەین، دبێژیت ژی، "پشتەڤانیا چارەسەرکرنا ئاریشەیا مووچەیێ مووچەخۆرێن هەرێمێ دکەین".

جۆ بایدن سەرۆکێ ئەمریکا ل دەمێ جڤینێ دگەل محەمەد شیاع سودانی سەرۆک وەزیرێن عێراقێ ل کۆچکا سپی ڕاگەهاند، پشتەڤانیا ئەنجامدانا هەلبژارتنا پەرلەمانێ کوردستانێ دکەین و دڤێت هەلبژارتن ب ئاوایەکێ ئازاد و شەفاف برێڤەبچیت.

ئاماژە ب وێ یەکێ ژی کر، هەرێما کوردستانێ پشکەکا نەڤەقتیایە ژ سەقامگیری و خۆشگوزارانیێ ل عێراقێ.

دەربارەی ئاریشەیا مووچەیێ مووچەخۆرێن هەرێمێ ژی بەحسا وێ یەکێ کر، ئەو پشتەڤانیا چارسەرکرنا مووچەیێ مووچەخۆران دکەن، گوتژی، "دڤێت دانا مووچەیێ مووچەخۆرێن هەرێمێ بەردەوام بیت".

هەڤدەم، ئێکەمجارە د هەیاما 32 سالێن دەربازبووی دا سەرۆکێ ئەمریکا تەکەزیێ لسەر ئەنجامدانا هەلبژارتنا پەرلەمانێ کوردستانێ بکەت و پشتەڤانیا خۆ بۆ ئەنجامدانا هەلبژارتنێ ڕابگەهینیت.

دوهی دووشەمبی، محەمەد شیاع سودانی سەرۆک وەزیرێن عێراقێ دگەل جۆ بایدن سەرۆکێ ئەمریکا جڤیا و لدیڤ زانیاریان د وێ جڤینێ دا هەمی کەرتێن هەڤبەش دناڤبەرا ئەمریکا و عێراقێ دا دهێنە گۆتۆبێژکرن کرن.

لدیڤ زانیاریان سەرۆک وەزیرێن عێراقێ د جڤینا دگەل وەزیرێ دەرڤەیێ ئەمریکا دا ل کۆچکا سپی ڕاگەهاند، هەلبژارتنا هەرێمێ د دەمێ خۆدا نەهێتە کرن دێ مەترسیێ ل سەر قەوارەیا هەرێمێ دروست کەت.

ئەڤە د دەمەکی دایە، مەها شەشا ئەڤسالە بۆ ئەنجامدانا هەلبژارتنا پەرلەمانێ کوردستانێ هاتیە دیارکرن و گەلەک گڤاشتنێن ناڤخۆیی و نێڤدەولەتی لسەر ئالیێن دەستهەلاتێ یە بۆ ئەنجامدانا هەلبژارتنێ د دەمێ خۆ دا.