ئێران و ئەمریکا لە جنێف بە نێوەندگیریی عوممان گەڕێکی دیکەی دانوستانیان ئەنجامدا و وتەبێژی وەزارەتی دەرەوەی ئێرانیش دەڵێت، شاندی دانوستانکاری وڵاتەکەیان گفتوگۆیەکی چڕ و پڕی بۆ نزیکەی سێ کاتژمێر لەگەڵ ئەمریکا ئەنجام داوە.
ئەمڕۆ پێنجشەممە ٢٦ـی شوباتی ٢٠٢٦، جارێکی تر شاندی دانووستانکاری ئێران و ئەمریکا لە جنێف کۆبوونەوە و لایەنی ئەمریکی ستیڤ ویتکۆف سەرۆکایەتی دەکات و ئێرانییەکانیش عەباس عێراقچی سەرۆکایەتی دەکات.
دوای کۆبوونەوەکە
ئیسماعیل بەقائی، وتەبێژی وەزارەتی دەرەوەی ئێران وتی، شاندی دانوستانکاری وڵاتەکەیان
گفتوگۆیەکی چڕ و پڕی بۆ ماوەی نزیکەی سێ کاتژمێر لەگەڵ ئەمریکا ئەنجام داوە.
دەشڵێت، کە هەردوو
تیمی دانوستانکاری ئەمریکی و ئێرانی، دید و بۆچوونەکانی خۆیان بە شێوەیەکی جددی
خستە روو.
وتیشی، هەڵوێستەکانیان
جێگیر و نەگۆڕن، هیوادارە دانوستانەکان سەبارەت بە هەردوو تەوەری سەرەکی،"بەرنامەی
ئەتۆمی" و "هەڵگرتنی سزاکان"، درێژەیان پێ بدرێت. سەبارەت بە خشتەی
کاتیی کۆبوونەوەکانیش وتی، بڕیارە هەر ئەمشەو گەڕێکی دیکەی دانوستان ئەنجام
بدەنەوە.
جێگری سەرۆکی ئەمریکاش
دەڵێت، ترەمپ بەهیچ شێوەیەک نایەوێت و رێگا نادات ئێران ببێتە خاوەنی چەکی ئەتۆمی،
بۆیە هەوڵدەدات ئەم ئامانجە لە رێگەی دیبلۆماسیەوە بەدیبهێنێت.