شاندی ئۆکرانیا دەلێت، ئەم هەموارە وەڵامدانەوەی بەرژەوەندییە نەتەوەییەکان و پێداویستییە ستراتیجییە سەرەکییەکانە و وتیشی کیڤ لەم بارەیەوە هیچی نەوتووە.

تا ئێستا ئاشکرا نییە کە پلانە نوێکان چۆن مامەڵە لەگەڵ پرسی مسۆگەرکردنی ئاسایشی ئۆکرانیا دژی هەڕەشە بەردەوامەکانی رووسیا.

هاوکات، بەرپرسانی ئەمەریکا و ئۆکرانیا بە میدیاکانیان وت، پێش پێنجشەممەی داهاتوو کە وادەی کۆتاییە کار لەسەر خاڵەکانی پرۆژەکە دەکەن.

دۆناڵد ترەمپ، سەرۆکی ئەمەریکا، بەردەوام فشار دەخاتە سەر ئۆکرانیا بۆ گەیشتن بە رێککەوتن و رۆژی یەکشەممەی رابردوو وتی، ئۆکرانیا هیچ سوپازگوزارییەکی نییە بۆ هەوڵەکانی ئەمریکا بۆ کۆتایهێنان بە جەنگ و دواتر بەرپرسانیئۆکرانیا سوپاسی پشتگیرییەکانی ترەمپیان کرد.

ترەمپ پێشتر رۆژی پێنجشەممەی داهاتوو، ٢٧ـی تشرینی دووەمی بۆ ڤۆلۆدیمیر زێلێنسکی دیاری کربوو، بۆ قبووڵکردنی پلانی ئاشتی و بەپێی سەرچاوەکان ئەگەری هەیە زێلێنسکی، سەرۆکی ئۆکرانیا لەم هەفتەیەدا سەردانی ئەمریکا بکات بۆ گفتوگۆکردن دەربارەی پلانەکە لەگەڵ دۆناڵد ترەمپ.

هەفتەی رابردوو لەلایەن ئەمەریکاوە پێشنیاری سەرەتای کرا و داوایان لە ئۆکرانیا کرد، دەستبەرداری بەشێک لە خاکەکەی بێت و توانا و ژمارەی سوپاکەی کەم بکاتەوە و واز لە هەوڵی بوونە ئەندامی هاوپەیمانیی ناتۆ بهێنێت و یاسادانەرانی دیموکرات رەخنەیان لەو پێشنیارە گرت و بە لیستی داخوازییەکانی رووسیا وەسفیان کرد و هاوکات، مارکۆ رۆبیۆ، وەزیری دەرەوەی ئەمریکا دڵنیایدا کە واشنتن ئەو پێشنیازەی لەسەر بنەمای راوێژ لەگەڵ هەردوو لایەنی جەنگەکە دارشتووە.

دوێنێ یەکشەممە پێشنیازێکی دیکەیان بڵاوکردەوە و لە پێشنیارە نوێکەدا، رووبەری ئەو خاکە کەمکراوەتەوە کە دەبێت ئۆکرانیا دەستبەرداری بێت و دڵنیایش دەدەنە ئۆکرانیا لە ئەگەری هێرشی رووسیا بۆ سەریان، ناتۆ و ئەمریکا بەرگرییان لێدەکەن.