ئەوەش خراوەتەروو، بەپێی رێنماییە نوێیەکە، تەنها ئەو ئۆتۆمبیلانەی کە ستانداردە تایبەتەکانی ژینگەیی و تەکنیکییان تێدایە و بەشێوەی یاسایی و فەرمی هاوردەی هەرێمی کوردستان كراون، مافی تۆمارکردنییان وەکو تاکسی دەبێت.
باس لەوەشکراوە، ئەو ئۆتۆمبیلانەی كە کەمخەرجی و دۆستی ژینگەن کە تەنها بە بەنزین کاردەکەن، یان ئەو ئۆتۆمبیلانەی لە بنەڕەتدا تەنها بە غازی شلی (LPG) کاردەکەن، هەروەها ئۆتۆمبیلی هایبرید و ئۆتۆمبیلی تەواو کارەبایی (EV)ـین وەکو تاکسی بێ رسومات ئاسانکاری تەواویان بۆ تۆمارکردنیان کراوە.
ئەوەش خراوەتەڕوو، بە گوێرەی ئەو رێنماییە هیچ ژمارەیەکی تاکسی لەسەر ئاستی کوردستان زیاد نابێت، بەڵکو ئەو تاکسیانەی هەن خاوەنەکانیان دەتوانێت سوود لە تابلۆکانیان وەربگرن بۆ تاکسی مۆدێل نوێ (کە ژمارە کاتی بن یان ئۆتۆمبیلی دوایین سێ مۆدێل تۆمارکراو بن) و تاکسییە کۆنەکانیش بکرێنەوە ئۆتۆمبیلی تایبەت و تابلۆی تایبەتیان بێ خەرجی دارایی پێ دەدرێت.
هەروەها، بە گوێرەی رێنماییە نوێیەکە، رەنگی تاکسی نوێ هەمان ڕەنگی تاکسی کوردستان بە کۆدی (4Q0)دەبێت و خاوەن تاکسی دەتوانێت لە کوردستان بەم کۆدە تاکسییەکی بۆیە بکات یان لە کۆمپانیایەوە بەم رەنگ و کۆدە بەردەست بێت بۆ کڕین. تاکسییە کۆنەکانیش بە گوێرەی خواستی خاوەنەکەی بۆیە دەکرێنەوە بە هەر رەنگێکی پەسندکراو جگە لە رەنگی تاکسی.
وتیشی، پێویستە ئۆتۆمبیلەکان تازە هاوردە کراوبن و پێوەرەکانی سەلامەتی، تەکنیکی، و ژینگەیی تێدابێت کە لە رێنمایی هاوردەکردنی ئۆتۆمبیل ژمارە ٧ی ساڵی ٢٠٢١ی هەموارکراودا دیاریکراون، تەنها ئۆتۆمبیلەکانی سێ ساڵی مۆدێلی کۆتایی پەسندکراون بۆ گۆڕین بۆ تاکسی، بۆ ئۆتۆمبیلی هایبرد و تەواوکارەبایی (٧٤) جۆر و بۆ ئۆتۆمبیلی بەنزین (٨٩) جۆر وەکو پاشکۆ دیارکراون کە رێگاپێدراون بگۆڕدرێن بۆ تاکسی.