کێڵگەی غازی کۆرمۆر دوێنێ کرایە ئامانج؛

چاوگێک لە کێڵگەی غازی کۆرمۆر لەسەرەتای هێرشەکەدا بە دیجیتاڵ میدیای ئێن ئاڕ تی راگەیاند، کێڵگەی غازی کۆرمۆر بە ئامانج گیراو بەهۆیەوە زەنگی ئاگادارکردنەوە لە کێڵگەکەدا لێدەدرێت.

هەر بەهۆی هێرشەکەوە چوار کەس گیانیان لەدەستدا و سیانی دیکەش برینداربوون، لەبارەی هێرشەکەشەوە محەمەد شیاع سودانی سەرۆکوەزیرانی عێراق، دەستبەجێ داوای پێکهێنانی لیژنەی کرد بۆ لێکۆڵینەوە لە رووداوەکە.

هێرشە درۆنییەکان لە دوو ساڵی رابردوودا؛

لەماوەی دوو ساڵی رابردوودا زیاتر لە ١٦ موشەک و درۆن ئاراستەی  کێڵگەی غازی کۆرمۆر کراوە کە بەهۆیەوە زیاتر لە دوو هەزار و ٥٠٠ مێگاوات لە کارەبا کەمی کردووە لە هەر هێرشێکی مووشەکی و درۆنیدا. 

وردەکاری هێرشەکان بۆسەر کێڵگەی کۆرمۆر؛

رۆژی ٢٢ـی ٦ـی ٢٠٢٢؛ کاتژمێر ٤:٤٥ خوولەکی دوای نیوەڕۆ هێرشێک کرایە سەر کۆمپانیای دانەغاز لە سنوری چەمچەماڵ.

رۆژی ٢٣ـی ٦ـی ٢٠٢٢؛ بەلە دووکات و ساتی جیاوازدا هێرشکرایە سەر کێڵگەی غازی کۆرمۆر و زیاتر لە شەش موشەک ئاڕاستەی کێڵگەکە و کۆمپانیای دانەغاز کران لە سنووری قادرکەرەمی سەر بە قەزای چەمچەماڵ.

رۆژی ٢٤ـی ٦ـی ٢٠٢٢؛ بۆ جاری سێیەم لەماوەی ٢٤ کاتژمێردا بە موشەک هێرشکرایە سەر کێڵگەی غازی کۆرمۆر.

رۆژی ٢٥ـی ٦ـی ٢٠٢٢؛ لە رێگای چەند موشەکێکەوە بۆ پینجەم جار لەماوەی ٤٨ کاتژمێری لەسەر یەک هێرش کرایەوە سەر گێڵکەی غازی کۆرمۆر.

رۆژی ٣٠ـی ٨ـی ٢٠٢٣: هاوەن و کاتیۆشا هێرشکراوەتە سەر کێڵگەی غازی کۆرمۆر لە ناحیەی قادر کەرەم.

رۆژی ٢٥ـی ١ـی ٢٠٢٤؛ بە موشەک هێرشکرایە سەر کێڵگەی غازی کۆرمۆر و ئاگر لە بەشێکی کێڵگەکە کەوتەوە.

رۆژی ٢٦ـی ٤ـی ٢٠٢٤؛ کێڵگەی غازی کۆرمۆر لە رێگای چەند درۆنێکەوە بۆ هەشتەم جار بە ئامانج گیرایەوە.