پەیامنێری ئێن ئاڕ تی ئەوەشی خستەڕوو، لە ئێستادا تیمەکانی بەرگری شارستانی هەولێر سەرقاڵی کوژاندنەوەی ئاگرەکەن.

ئەوەش لەکاتێکدایە، شەوی ٥ـی ئایار ئاگر لە بازاڕی قەیسەری هەولێر کەوتەوە و چەندان تیمی بەرگری شارستانی هەولێر خرانە ئامادەباشییەوە بۆ کۆنتڕۆڵکردنی ئاگرەکە و دوای زیاتر لە چوار کاتژمێر لەلایەن تیمەکانی بەرگری شارستانییەوە کۆنتڕۆڵ کرا.

لەو بارەیەوە، پارێزگای هەولێر رایگەیاند، لە ئاگرەکەی شەوی ٥ـی ئایار لە بازاڕی قەیسەری هەولێر، ٢٢٧ دوکان و حەوت کۆگا سوتاون و زیانیان بەرکەوتووە. وتیشی، "١٥ برینداری رووداوەکە رەوانەی نەخۆشخانە کراون".

هاوکات، وەزارەتی کارەبای حکومەتی کاربەڕێکەری هەرێم رایگەیاند، لیژنەی لێکۆڵینەوەی رووداوە نەخوازراوەکان سەردانی بازاڕی قەیسەری کردووە و دەستیان بە لێکۆڵینەوە کردووە و بۆیان دەرکەوتووە کە هۆکاری ئاگرەکە شۆرتی کارەبا نەبووە.

لەلایەکی دیکەشەوە، قائیمقامی هەولێر بە دیجیتاڵ میدیای ئێن ئاڕ تی راگەیاند ، لەسەر رووداوی ئاگرکەوتنەوەکەی بازاڕی قەیسەری هەولێر چەند کەسێکیان دەستگیر کردووە.

ئەوەش بۆ دووەم جارە لە ساڵی ٢٠١٨ـەوە، ئاگرێکی گەورە لە بازاڕی قەیسەری هەولێر بکەوێتەوە و لەمساڵدا چوارەم رووداوی گەورەی ئاگرکەوتنەوەیە لە بازاڕەکانی هەولێردا.

لە سەرجەم رووداوەکانی ئاگرکەوتنەوەدا لەمساڵدا، زیانێکی زۆر بەر کاسبکار و خاوەن دوکانەکان کەوتووە، حکومەتی کاربەڕێکەریش تا ئێستا قەرەبووی ئەو کەسانەی نەکردووەتەوە کە بەهۆی ئاگرکەوتنەوەوە زیانیان بەرکەوتووە و زۆربوونی ژمارەی رووداوەکان، گومانی لای هاوڵاتییان و کاسبکاران دروست کردووە.

شارا ئازاد، هەولێر