پسپۆرێکی خۆراک ئاشکرایکردووە، قەرەخەرمان یەکێکە لە خواردنە کوردەوارییەکان، دوو جۆری باوی هەیە قەرەخەرمانی سەوز و قەرە خەرمانی وشکراو، دەکرێت وەک بژاردەیەکی باش لە جێگەی برنج دابنرێت‌.

کامەران رەسوڵ ژاژڵەیی پسپۆڕی زانستی خۆراک لە پەڕەی فەرمی خۆی لە فەیسبوک رایگەیاندووە، پێکهاتووی قەرەخەرمانی سەوز زۆر له پێکهاتووی ( کینوا) دەچێت ( بڕی کالۆری و چەوری ) زیاترە، کۆمەڵێک سوودیته‌ندروستی هەیە چونکە جۆرێکە لە دانەوێڵە تەواوەکان کە هەمیشە جەغت لە سەر خواردنی دەکرێت.

گرنگترین سوودە تەندروستیەکانی قەرەخەرمان:

یەکەم: بەهێزکردنی کۆئەندامی هەرس و کاراکردنی پڕۆسەی هەرسکردنی خۆراک و کەمکردنەوەی کێشەکانی وەک قەبزی و غازاتی زۆر و سکچوون، چونکە بڕێکی زۆر لە ماددە ڕیشاڵەکانی تیدایە .

دووەم: یارمه‌تیدانی کۆنتڕۆڵکردنی ئاستی شه‌کره‌ له‌ خوێندا، بە جێگرەوەیەکی باش دادەنرێت لە جیاتی برنج چونکە گلایسمیک ئیندێکسەکەی ( ٤٣ ).

سێیەم: زۆر به‌سووده‌ بۆ ڕێگریکردن له‌ قه‌ڵه‌وبوونه‌وه‌ و زۆری کێش: چونکه‌ بڕێکی زۆری پڕۆتینی که‌م تێدایه‌ و ده‌وڵه‌مه‌نده‌ به‌ مادده‌ ڕیشاڵییه‌کان و بۆ ماوەیەکی زۆر هەست بە تێریی دەکەیت.

چوارەم: یارمەتی چارەسەری هەوکردنەکانی کۆئەندامی هەرس دەدات، وەک کۆنیشانەی گرژبوونی کۆڵۆن بە هۆی بوونی پڕۆبایۆتێکەکان، پسپۆڕەکان لەو باوەڕەدان کە توانای دابینکردنی خۆراکی پێویستی هەیە بۆ بەکتریا بەسوودەکانی ڕیخۆڵە .

پێنجەم: یارمەتی بنیاتنان و بەهێزکردنی ماسولکەکان دەدات لەگەڵ بەرزکردنەوەی توانای ماسولکەکان، چونکە هەموو ( ١٠٠ گرام ) لە قەرەخەرمان بڕی ( ٢.٢ گرام ) لە ترشە ئەمینییەکانی تێدایە کە ناسراوە بە ( glutamic acid ) بەکارهێنانی لەلایەن وەرزشوان و یاریزانی لەشجوانی زۆر باوە .

شەشەم: یارمەتی بەهێزکردن و پاراستنی تەندروستی چاو دەدات چونکە دەوڵەمەندە بە ماددە دژەئۆکسانەکان.

حەوتەم: ئەو کەسانەی کە ماددەی گلۆتینیان پێ ناکەوێت یا نەخۆشی گەنم یا هەستیاریان بە دانەوێڵە هەیە نابێت بیخۆن.

هەشتەم: لە کاتی ڕێجیمی کیتۆی کلاسیک و پڕۆتینی زۆر و لۆکارب ڕێگاپێنەدراوە.

ئ.ل