ئه‌مساڵ وابڕیاره‌ رۆژی یه‌کشه‌ممه‌ ١٥ی ئایاری ٢٠٢٢ چواره‌مین دیداری چەمچەماڵ بۆ فیلمی جینۆساید رێکبخرێت.

لەم دیدارەدا ١٠ فیلم و کورته‌ فیلم نمایش ده‌کرێن که‌ فیلمی نوێی تێدایه‌ بۆ یه‌که‌مجاره‌ له‌سنوری چه‌مچه‌ماڵ نمایش بکرێن، هەروەها هەندێك فیلمی تێدایه‌ جگه‌ له‌ به‌شداری فیستیڤاڵه‌ جیهانی و ناوخۆییه‌کان تا ئێستا له‌هیچ هۆڵ و شوێنێک نمایش نه‌کراوه‌.

دیداره‌که به‌ پێشکه‌شکردنی چه‌ند پارچه‌ میوزیک و مه‌قام و به‌سته‌ی کوردی و گه‌رمیانی دەستپێدەکات .

له‌ناوه‌ڕۆکی چواره‌مین دیداری چه‌مچه‌ماڵ بۆ فیلمی جینۆساید پانێڵی (رۆڵی فیلم و سینه‌ما له‌ گه‌یاندنی چیرۆکه‌کانی جینۆسایدی کورد به‌جیهان) ئه‌نجام ده‌درێن که‌ مامۆستایانی زانکۆ و توێژه‌ران باس له‌ گرنگی و رۆڵی فیلم ده‌که‌ن له‌ ناساندنی که‌یسی ئه‌نفال و جینۆسایدی کوردان به‌ جیهان.

ئامانج له‌ دیداری‌ ‌چه‌مچه‌ماڵیش ئه‌وه‌یه‌ که‌ له‌ ئاینده‌دا وه‌کو ناوه‌ندێکی قوربانی جینۆساید ببێته‌ فیستیڤاڵێکی نێوده‌وڵه‌تی و ساڵانه‌ بتوانین له‌و فیستیڤاڵه‌دا ئه‌و فیلم و به‌رهه‌مه‌ هونه‌ریانه‌ کۆبکه‌ینه‌وه‌ که‌ گوزارشت له‌ جینۆسایدی سه‌رجه‌م نه‌ته‌وه‌ و گه‌له‌کانی جیهان ده‌کات.

یه‌کێکی دیکه‌ له‌ ئامانجه‌کانیان ئه‌وه‌یه‌ ساڵانه‌ به‌شێک له‌و فیلم و دۆکۆمێنته‌ری و به‌رهه‌مانه‌ی له‌سه‌ر ئه‌نفال و جینۆسایدی کورد به‌رهه‌م هێنراوه‌ ئاشنابکرێن به‌ هونه‌رمه‌ندان و رۆشنبیران و چالاکوانانی بواره‌که‌ و خه‌ڵکی سنوره‌که‌مان هه‌روه‌ها هونه‌رمه‌ندان و فیلمسازان و به‌رهه‌مهێنه‌رانی هونه‌ریش بانگهێشتی سنوره‌که‌ بکه‌ین و ئاشنایان بکه‌ین به‌شوێن و چیرۆکه‌کانی ئه‌نفال وه‌کو لای هه‌مووان ئاشکرایه‌ سه‌دان چیرۆکی نه‌بیستراو و نه‌بینراو هێشتا له‌ڕزگاربووانی ئه‌نفال هه‌یه‌ و ده‌رچه‌یه‌ک نه‌بووه‌ بیگه‌یه‌نن.