کۆمپانیایەکی ئەمریکی یەکەمین پاسکیلی ئەلیکترۆنی بە نوێترین تەکنەلۆژیای زیرەکی دەستکردوەوە نمایشکرد.

کۆمپانیای "Orbic" کە بنکەکەی لە نیویۆرکە، یەکەم پاسکیلێکی ئەلیکترۆنی لە جیهاندا نمایشکرد کە 5Gی هەیە و AI کاردەکات، تایبەتمەندی سەرەکییەکەی بریتییە لە سیستەمی AI ، کە یارمەتی پاسکیلسوارەکان دەدات لە خۆپاراستن لە شتەکانی دەوربەریان، بەشێوەیەک پاسکیلسوارەکان ئاگادار دەکاتەوە لە مەترسییە ئەگەرییەکانی وەک ئۆتۆمبێلەکانی بەرامبەر، هەروەها Orbic 5G eBike یەکخستنی 5G ی هەیە، کە بەکارهێنەرانی دەتوانن پەیوەندی بکەن لەگەڵ پاسکیلسوارە ئەلیکترۆنییەکانی تر.

لە بەیاننامەیەکدا کۆمپانیاکە ڕایگەیاندووە، پاسکیلەکە ئاگادارکردنەوەی دەنگی و بینراوی خێرایی هەیە بۆ ئەوەی هۆشیاری و سەلامەتی بە بەکارهێنانی AIدابین بکات، جگە لەوەش پاسکیلەکە چەندین کامێرای هەیە بۆ دڵنیابوونەوە لە سەلامەتی پاسکیلسوارەکان.

کامێرای دواوەی پاسکیلەکە ٢ مێگاپێکسڵە، کە یارمەتیدەرە لە خۆپاراستن و دووکەوتنەوە لە پێکدادان و دیاریکردنی شتەکانی دەوروبەری پاسکیلەکە، جگە لەوەش کامێرای ٨ مێگاپێکسڵی هەیە کە ڕێگە بە پاسکیلسوارەکان دەدات پەیوەندی ڤیدیۆیی ئەنجام بدەن.

پاسکیلەکەی AIخاوەنی شاشەیەکی ٧ ئینجییە کە ئەم زانیاریانە پیشان دەدات ( پاتری ، خێرایی ، دووری ، نەخشە ).

مایک نارولا بەڕێوەبەری جێبەجێکاری کۆمپانیاکە دەڵێت "بە یەکخستنی پەیوەندی 5G و تەکنەلۆژیای AI، ئامانجمان پاراستن و سەلامتی پاسکیلسوارەکانە، هەروەها دەمانەوێت بەرپرسیارتر بین لە ڕووی ژینگەییەوە."