بە گوێرەی ئاژانسی تەسنیم، تەوەری سەرەکیی گفتوگۆکە تەرخان کرابوو بۆ تاوتوێکردنی پێشهاتەکانی ناوچەکە دوای هێرشەکانی ئەمریکا و ئیسرائیلەوە کرانە سەر ئێران، لەگەڵ هەڵسەنگاندنی لێکەوتە ناوچەیی و جیهانییەکانی ئەو جەنگە.

ئاماژە بەوەشکراوە، مەسعود پزیشکیان سەرنجی خستووەتە سەر هەوڵەکانی ئیسرائیل و حکومەتی ئەمریکا بۆ نانەوەی ئاژاوە و دووبەرەکی لە نێوان ئێران و وڵاتانی دراوسێیدا.

لە گفتوگۆکەدا سەرۆک کۆماری ئێران ئەو تۆمەتانەی رەتکردەوە کە لەلایەن میدیاکانی سەر بە بەرەی ئەمریکییەوە بڵاوکراونەتەوە، گوایە ئێران هێرشی مووشەکی کردووەتە سەر وڵاتی تورکیا و وتویەتی، ئێران هەمیشە ئامادەیی خۆی بۆ کەمکردنەوەی گرژییەکان لە ناوچەکەدا دەربڕیوە، بەڵام ئەمە بەو مەرجەیە کە ئاسمان، خاک و ئاوەکانی دراوسێکانمان بۆ هێرشکردنە سەر گەلی ئێران بەکار نەهێنرێت.

لای خۆیەوە، ئەردۆغان ئاماژەی بە بەردەوامیی هەوڵەکانی دیپلۆماسیی وڵاتەکەی کرد بۆ هێورکردنەوەی دۆخەکە و رایگەیاند، "ئێمە لە هەموو دەرفەتێکدا بە ئاشکرا وتوومانە کە دەستوەردان لە کاروباری ناوخۆی ئێران جێگەی قبووڵ نییە. هەڵکشانی گرژییەکان لە نێوان وڵاتانی ناوچەکەدا، نە خزمەت بە بەرژەوەندییەکانی دراوسێکان دەکات و نە لە بەرژەوەندیی درێژخایەنی ئێراندایە."

باسی لەوەشکردووە، ئەوان بە هیچ شێوەیەک بیر لە رووبەڕووبوونەوە لەگەڵ ئێران ناکەنەوە و زۆر بەباشی لەو بارودۆخە سەختە تێدەگەن کە باڵی بەسەر ئێراندا کێشاوە، بۆیە تا ئەو جێگەیەی لە توانای حکومەتی تورکیادایە، ئامادەن بەشدار بن لە کەمکردنەوەی ئاڵۆزییەکان لە ناوچەکەدا.