ئاماژەی بەوەشکرد، بەنداوی دوکان بۆ پڕکردنەوەی کورتهێنانی ئەو کارەبایەی بەرهەم دەهێنرێت لە کۆرمۆر یەکەی زیاتری کارپێکردووە و ئاوێکی زۆر بەردراوەتەوە، ئەمەش بووەتە هۆی ئەوەی پیسیەکی زۆر بێنێتە سەر پڕۆژەکانی دابەشکردنی ئاوی دوکان- سلێمانی.

ئەوەشی خستبووەتەڕوو، بەهۆی ئەوەی رۆژی هەینی بووە و گەشتیاری زۆر لەو سنوورە لە گەشت بوون، پاشەڕۆیان خستووەتە دەریاچەکەوە و لەبەر سەلامەتی پڕۆژەکان، تاوەکو کاتێکی نادیار رادەگیرێن.

دوای ئەو رووداوانەش، ئەمڕۆ بەڕێوەبەرایەتی ئاوی سلێمانی رایگەیاند، کە دابەشکردنی ئاو دەستیپێکردووەتەوە.

ئەوەش لە کاتێکدایە، دوێنێ هەینی کاتژمێر ٦:٥٠ خولەکی ئێوارە بۆ هەشتەم جار کێڵگەی غازی کۆرمۆر بە ئامانج گیرا و دوو دەنگی بەهێز لەنێو کێڵگەکەدا بیسترا کە بەهۆیەوە زەنگی ئاگادارکردنەوە لێدراوە، بەهۆی هێرشەکانیشەوە، چوار کەس گیانیان لەدەستدا.

دوابەدوای هێرشەکە، وەزارەتی کارەبا و سامانە سروشتییەکانی حکومەتی کاربەڕێکەری هەرێم بڵاویان کردەوە، بەهۆی هێرشێکی درۆنی بۆ سەر کێڵگەی غازی کۆرمۆر ناردنی گاز بۆ وێستگەكانی بەرهەمهێنانی کارەبا راوەستاوە و بەوهۆیەوە نزیکەی دوو هەزار و ٥٠٠ مێگاوات کارەبا کەم بووەتەوە.