دکتۆر دیلمان ئازاد خۆشناو پسپۆری پزیشکی دادوەری لە بابەتێکدا ئاماژەی بەوەکردووە کە پەردەی کچێنی هیچ بەهایەکی زانستی و ئاینی نییە و نابێتە پێوەر بۆ پاکیزەیی کچان بەڵکو پاکیزەیی مرۆڤ پەیوەندی بە بیری باش و کردەوەی باشەوە هەیە.

پسپۆڕەکە چیرۆکێک دەگێڕێتەوە کە تێیدا دوو گەنج بڕیاری هاوسەرگیری دەدەن و پاشان بەهۆی بوونی کێشەیەکەوە کە لە پیاوەکەدا بووە ژنەکە بووەتە قوربانی.

چیرۆکەکە بەوە دەست پێدەکات کە لە شەوی بووکێنیدا خوێن نەبینرابوو، نەبینینی خوێن بوو بە کارەساتێک بۆ بووکەکە و بە مەرگی کۆتاییهات، بەبێ ئەوەی هیچ کێشەیەک لە پەردەی کچێنیشیدا هەبێت، بەهۆی نەبینرانی خوێنەوە لە شەوی بووکێنی، سووکایەتییەکی زۆری پێکرابوو لەلایەن ماڵی زاواوە و ئەشکەنجەش درابوو.

پسپۆڕەکە دەڵێت: پاشان بوکەکە هێنرا بۆ پشکنین، دەرکەوت هیچ کێشەیەکی نییە و تەنانەت لەو جۆرە پەردانەش نییە کە ناهێڵن خوێنهاتن ڕووبدات، پەردەیەکی تەواو ئاسایی بووە، دواتر زاوا نێردراوە بۆ پشکنین لەلای پسپۆڕی میز و میزەڕۆ و دەرکەوت گرفتی هەیە لە ئەندامی زاووزێ و جووتبووندا.

گرفتی زاوا شاردرایەوە و کەس پێێ نەزانی، بۆیە کێشەکە ڕوویکردەوە چارەنووسی بووکەکە، دوای ئەوەی نێردرایەوە ماڵی باوان، ئەوانیش بۆ ڕووسپیکردنەوەیان لەناو کۆمەڵگەی دواکەوتوودا، کچەکەیان کوشت، لێرەدا کچەکە بووە قوربانیی باوەڕی هەڵەی کۆمەڵگە.

پسپۆڕەکە باس لەوەش دەکات کە دەبێ هەموان بزانن، پەردەی کچێنی لەرووی زانستییەوە بەهای نییە و بە یەکێک لە پاشماوە زیادەکان لە جەستەی مرۆڤدا دادەنرێت و لە بەدواداچوونم بە هاوکاری مامۆستایانی ئایینی و زانایانی ئیسلامی بۆم دەرکەوتووە ئایین هیچ بەهایەکی بۆ دانەناوە و لە تێکستە ئایینییەکاندا هیچ گرنگییەکی پێ نەدراوە.

هەروەها باس لەوەش دەکات کە ئەم پەردەیە لە بەشێک لە کچاندا بەشێوەیەکە خوێنی لێ نایەت، لەو کچانەشدا کە لە جۆرە ئاساییەکەیە، لەوانەیە بە وەرزشێکی قورس یان زەبرێکی توند بدڕێت و لە ئاییندەدا لە پرۆسەی جووتبووندا خوێنی لێنەیەت، هەروەک دەرکەوتنی خوێنیش مانای ئەوە نییە کەسەکە جۆری دیکەی سێکسی نادروستی نەکردبێت.

لە کۆتای قسەکانیدا دکتۆرەکە ئاماژەی بەوەکردووە کە ئەم پەردەیە ئاماژەیەکی تەواو نییە بۆ پاکیزەیی و گرنگە کۆمەڵگە هۆشیاربکرێتەوە کە پاکیزەیی مرۆڤ بە بیری باش و کردەوەی باشیەتی لە کۆمەڵگەدا، نەک هەبوون و نەبوونی پەردە.