بڕیارە لە ٧ی ئەیلولی ٢٠٢٥دا مانگگیرانی تەواو
کە بە مانگی خوێنیش ناسراوە ڕووبدات، پێشبینی دەکرێت بۆ ماوەی ٨٢ خولەک بەردەوام
بێت.
بەپێی هەواڵێکی ماڵپەڕی " gulf
news" دانیشتوانی جیهان چاوەڕوانی دیاردەیەکی
فەلەکی ناوازە دەبن، لە شەوی ٧ ئەیلوولی ٢٠٢٥دا مانگگیرانێکی دەگمەنی تەواوەتی
روودەدات کە درێژترین مانگگیرانە لە ساڵدا.
زیاتر لە شەش ملیار کەس لە ئاسیا و ڕۆژئاوای
ئوسترالیادا، کە دەکاتە 77%ی دانیشتوانی جیهان دەتوانن شایەتحاڵی تەواوی
مانگگیرانەکە بن، تێڕوانینی بەشەکی چاودێران وایە کە لە ئەوروپا و ڕۆژهەڵاتی ناوەڕاست
و ئەفریقادا لەگەڵ بەرزبوونەوەی رێژەی مانگ مانگگیرانەکە دەبینن.
کۆی گشتی مانگگیرانەکە ٨٢ خولەک دەخایەنێت،
بەمەش دەبێتە یەکێک لە درێژترین مانگگیرانەکانی ئەم دەیە، ئەم دیمەنە فەلەکناسییە
بە دیاردەیەکی ناوازە و تایبەت باس دەکرێت.
لە کاتی مانگگیرانی تەواودا زەوی ڕاستەوخۆ لە نێوان
خۆر و مانگدا تێدەپەڕێت، تیشکی خۆر کە بە بەرگەهەوای زەویدا تێدەپەڕێت و بەرەو
مانگ دەشکێت درەوشاوەیەکی قووڵ و سوور دەخاتە سەر ڕووی مانگ بەم شێوەیەش مانگ بە
سووری تۆخ دەردەکەوێت، دیاردەیەکەش بە "مانگی خوێن" ناسراوە.
لێرەدا دیارترین کاتەکان لە چەند شارێکدا
دەخەینەڕوو:
قاهیرە، ڕیاز، بەغدا، بەیروت، دیمەشق، عەمان:
کاتژمێر ٨:٣٠ شەو تا ٩:٥٢ شەو
پەکین و هۆنگ کۆنگ: کاتژمێر ١:٣٠ بەیانی تا
٢:٥٢ بەیانی
تۆکیۆ: کاتژمێر ٢:٣٠ بەیانی تا ٣:٥٢ بەیانی
سیدنی: کاتژمێر ٣:٣٠ بەیانی تا ٤:٥٢ بەیانی
مۆسکۆ: کاتژمێر ٨:٣٠ی شەو تا ٩:٥٢ی شەو
ئەستەنبوڵ: کاتژمێر ٨:٣٠ شەو تا ٩:٥٢ شەو
لەندەن: کاتژمێر ٦:٣٠ی ئێوارە تا ٧:٥٢ی ئێوارە
شارەکانی وەک کازابلانکا و تونس و جەزائیر تەنها
لە قۆناغە سەرەتاییەکان یان کۆتاییەکانیدا شاهیدی مانگگیرانەکە دەبن.