ئینتماى نەتەوەیی..

584 جار خوێندراوەتەوە

لە تۆفیق وەهبییەوە بۆ مامۆستا ئاینییەکەى سلێمانى (جولانى و حوسەرى) وەک نموونە ئەمڕۆ دوو هەواڵی جیاواز، دوو دیرۆکى جیا، یەکێکییان لە سلێمانى و ئەویتریان لە کەلار، تەواوى سۆشیال میدیاى تەنیوە. لە گەڕەکى ڕاپەڕینى شارى سلێمانى مامۆستایەکى ئاینى لە وتارى هەینى هێرشی توندى کردۆتە سەر شەڕەڤانانى حەلەب و بەکافرو لەدەرەوەى دائیرەى دین نێوزەدى کردوون، خەڵکى ئازاى سلێمانیش لێیان قبوڵ نەرکردووە و لەوتاردان وەستاندوویانە. هاوکات مامۆستایەکى ئاینى لە کەلار نوێژى مردووى بۆ شەهیدانى شێخ مەقسوود و ئەشرەفییە ئەنجامداوە لەگەڵ نوێژخوێنە بەڕێزەکان. من لەو بڕوایەدام دواى نەمانى ئینتماى نیشتمانى و نزیکبوونەوەى لە ئاستى سفر لە باشوورى کوردستان، خۆشبەختانە لە ئێستادا خەڵکى هۆشیاریی بەرانبەر بە نەتەوەکەى خۆی هەیە و لەناو گەنج و جاحێلان و لەنێو قوتابخانەو باخچەکاندا منداڵەکانمان بە باشی بەرانبەر بە نیشتمانەکەیان هۆشیار دەکرێنەوە. ئینتیما هەستێکی خودی رەسەنە لە تاکدا، پەیبردن بەم هەستە و نەشونماکردنى پەیوەستە بە تێکەڵبوون و کارلێککردنى تاک بە گروپ و کۆمەڵگاوە، کە بەهۆیەوە بۆی دەردەکەوێت، ئەو بەشێکە لەو نیشتمانەی تیایدا لە دایکبووە. لە بەرچەکردارى ئەم بوژانەوە نیشتمانییە و نیشتمانسازییەدا، گروپێک وەک هەمیشە لەنێو کوردان هەبووە و هەیە کە دژى نیشتمانى خۆیان دەوەستنەوە، لە ئێستادا ئەم گروپە لە خەڵک بە ئەکاونتى ساختە و بە کۆمێنتى نەشیاو لەدژى کوردبوون دەوەستنەوە و سوکایەتى بە خەباتى نیشتمانى کورد دەکەن، بەناوى بەرگریکردن لە ئاین.منەوەرى کورد (تۆفیق وەهبی) لە تۆمارێکى دەنگیدا، دەڵێت: (قاموسم بۆ زمانی كوردی دروست كرد ئینگلیزەكان پییان گوتم تۆ خەریكی كارێكی زۆر گەورەیت ، پێم وابوو یەكێك لە بنەماكانی نەتەوە –زمانە و- دەبێت پارێزگاریی لێبكرێت و بمێنێتەوە. بەڵام لە لایەن ژمارەیەك لە مەلاكانەوە هێرشی كراوەیە سەرم و بە پیاوی ماسۆنیەت لەقەڵەمیان دام). چونک لەو کاتەدا نەتەوەپەرستێکى وەکو ساتیع حوسەرى كە هەموو كارێكی مەعاریفی بەدەست بووە، ناڕازیی بووە لەبەرامبەر بەكارهێنانی پیتی لاتینی دا و پێی وابووە كە دەبێت پیتی عەرەبی بەكاربهێنرێت بۆ ئەوەی بەردەوام كورد لەژێر هەژموونی رۆشنبیریی عەرەبیدا بمێنیێتەوە.حوسری دوای ئەوەی لە بەردەم هەوڵ و پێداگریی وەهبیدا شکست ده‌هێنێت، پەنا بۆ کارتی دین دەبات بۆ شکستپێهێنانی پرۆژەکەی وەهبی. لە یاداوەرییەکەیدا دەڵێت نامەیەکم بۆ زۆربەی شێخ و مەلا کاریگەرەکانی کورد نارد و لەنامەکەدا نوسیم کە تۆفیق وەهبی دژە دین و ماسۆنییە و دەیەوێت ئەلفوبێی قورئان بگۆڕێت بە ئەلفوبێی کافران و کورد لە ئیسلام داببڕێت. هەروەها حوسری دەڵێت: ( لە خوتبەی جومعەدا زۆربەی مەلاکان پەیامەکەی منیان گەیاند و هێرشیان کردە سەر وەهبی و وەک کافر و ماسۆنی و دژە دین کەدەیەوێت کورد لە دین وەربگێڕێت وەسفییان کرد و نامەشییان بۆ وەزیر نارد کە کورد ئەلف و بێی لاتینی ناوێت. ناچار وەهبی پاشەکشەی کرد و ئەلفوبێی عەرەبی بۆ کتێبە مەنهەجییەکانی کوردی سەپێنر). کێشەکە جۆلانى و حوسەریی نییە، بەڵکو کێشەکە هەندێک لەو مەلا و بانگخواز و شێخ و ئاینپەروەرانەى ئەوسا و ئێستایە کەهیچ کات نەیانتوانییەوە لە چوارچێوەى کارى ئاینیدا پرۆژەى نیشتمانسازى و کوردبوون سەرپێبخەن و بیناى بکەن، ئەوان بەجۆرێکى ترسنام لە کوردبوون دابڕاوون و پێیان وایە گەر بەرگریی لە کوردبوون بکەن ئەوا دەمودەست کافر دەبن، بۆیە هەمیشە نەتوەیان خستۆتە خزمەتى نەک ئاینەوە بەڵکو کۆمەڵێک تیرۆریست و شۆڤێنىیەوە. ئەوان هەموو بەرخودان و خەباتێکى رەواى دۆزى نەتوەى بە دەرچوون لە دایرەى دین دەبیننین و خۆشێیان چڵکاوخۆرى مخابەراتى وڵاتانى ئیقلیمین.