وتیشی، پڕۆسەی گفتوگۆ و دانوستان لەگەڵ کۆماری ئیسلامی ئێران بەردەوامیی هەیە، سەرەڕای بڵاوبوونەوەی چەند راپۆرتێک کە ئاماژە بەوەدەکەن تاران پێشنیازەکەی ویلایەتە یەکگرتووەکانی ئەمریکای رەتکردووەتەوە.

ئاماژەی بەوەشکردووە، جەی دی ڤانس، جێگری سەرۆکی ئەمریکا، لە ماوەی رابردوودا بە شێوەیەکی کارا و راستەوخۆ بەشداریی لە تەواوی ئەو گفتوگۆ و دانوستانانەدا کردووە کە تایبەت بوون بە دۆسیەی ئێران.

سەبارەت بە هەواڵەکانی پەیوەست بە شکستی دیپلۆماسی، کۆشکی سپی جارێکی دیکە دڵنیایی دایەوە کە گفتوگۆکان لەگەڵ تاران بەردەوامن.

لێڤت دەشڵێت، ئامانجی سەرەکیی واشنتن هەمیشە ئاشتی بووە و ترەمپ نایەوێت مەرگ و وێرانکاریی زیاتر ببینێت، بەڵام جەختی کردەوە کە پێویستە تاران دان بەو واقیعە نوێیەدا بنێت کە لە رووی سەربازییەوە بە تەواوی شکستی خواردووە. وتیشی، "ئێمە توانای ناوەکی و توانای هێرشبەریی ئێرانمان بۆ سەر بەرژەوەندییەکانی ئەمریکا و هاوپەیمانەکانمان پەکخستووە. ئێستا دەبینین کە تاران بەدوای دەرچەیەکدا دەگەڕێت، چونکە درک بەوە دەکەن کە خەریکن وردوخاش دەکرێن."

لە بەشێکی دیکەی قسەکانیدا، باسی لە دۆخی مەیدانیی ناو ئێران کرد و رایگەیاند، "توانای تاران بۆ بەرگریکردن لە ناوچەکانی ژێر دەسەڵاتی خۆی بە شێوەیەکی خێرا کەم دەبێتەوە. ئەگەر ئەوان ئامادە نەبن ئەم واقیعە قبووڵ بکەن، ترەمپ دڵنیایی دەدات کە گورزی وایان لێ بوەشێنرێت کە لە مێژوودا هاوشێوەی نەبووبێت."