وەفدێکی یونامی سەردانی ئۆفیسی نەوەی نوێییان کرد و باسیان لە پرسی زیندانیکردنی سەرۆکی جوڵانەوەکە و ئەو پێشێلکاریانەیان کرد کە لەلایەن هەردوو حزبی دەسەڵاتەوە بەرامبەر نەوەی نوێ دەکرێت.
ئەمڕۆ چوارشەممە ١٥ـی تشرینی یەکەمـی ٢٠٢٥، وەفدێکی یونامی بەسەرۆکایەتی موتسی مورنیارادزی، بەرپرسی کاروباری سیاسی یونامی لە هەرێم کرد سەردانی ئۆفیسی نەوەی نوێیان کرد و لەلایەن کاوە عەبدولقادر، سەرۆکی لیستی نەوەی نوێ لە پارێزگای هەولێر پێشوازییان لێکرا.
لە دانیشتەکەدا پرسی زیندانیکردنی شاسوارعەبدولواحید،
سەرۆکی جوڵانەوەی نەوەی نوێ و ئەو پێشێلکاریانەی هەردوو حزبی دەسەڵات لە بەرامبەر
نەوەی نوێ دەیکەن لە دەستپێکی بانگەشەی هەڵبژاردنی پەرلەمانی عێراقەوە تا ئێستا
باس کران.
ئەوەش خرایە روو، کە دۆسیەی سەرۆکی جوڵانەوەی
نەوەی نوێ بەتەواوی سیاسیە و هیچ بنەمایەکی یاسای نیە، بەڵام دەسەڵات دادگاکان
بەکاردەهێنێت بۆ سەرکوتکردنی نەیارە سیاسیەکانی.
ئاماژە بەوەشکراوە، زیندانیکردنی شاسوار
عەبدولواحید لەم کاتەدا و دروستکردنی دۆسیەی بێ بنەما نیشانەی ترسی دەسەڵاتە لە نەوەی
نوێ، چونکە دەزانن جوڵانەوەی نەوەی نوێ پشتگیری جەماوەری فراوانی هەیە و تێگەیشتوون
کە خودی سەرۆکی جوڵانەوەکە چەندە کاریگەرە و بە مەترسی جددی دەزانن لەسەر
بەرژەوەندیە حزبی و بنەماڵەییەکانیان.