دوای کۆتایی هاتنی پرۆسەی ناونووسینی حاجیان ئێستا حەج و عومرەی هەرێم دەستیان کردووە بە وردبینیکردن لە داواکارییەکان و تاوەکو ئێستاشەش هەزار و ٥٥٦ کەس نامەیان بۆ چووە و ئاگادار کراونەتەوە کە پێویستە زانیارییەکانیان راست بکەنەوە.
ئەمڕۆ یەکشەممە، رۆژی پێنجی تشرینی یەکەمی ٢٠٢٥، بەڕێوەبەرایەتی حەج و عومرەی هەرێم لە راگەیەندراوێکدا بڵاویکردەوە، هەرچەندە نامەیان ناردووە بۆ ئەو کەسانە زانیارییەکان راستبکەنەوە، بەڵام تاوەکو ئێستا وەکو پێویست خەڵک نامەکانیان نەکردووتەوە و زانیارییەکانیان راست نەکردووەتەوە.
لە
راگەیەندراوەکەدا بەرێوەبەرایەتیەکە داوا لەو کەسانە دەکەن کە نامەیان پێگەیشتووە
بەرێگەی نامەی مۆبایل یان وەتسئاپ یان ڤایبەر بە زووترین کات زانیارییەکانیان
دروست بکەن و کەموکوڕی فۆرمەکانیان راست بکەنەوە چونکە ئەگەر بەم شێوەیە بمێننەوە
ئەوا مافی بەشداریکردنیان لە تیروپشکی ناوی حاجیانیان نابێت.
ئەوەشیان
روونکردووەتەوە، لە ئێستادا خەریکی پرۆسەی وردبینکردنی ناوی حاجیان و لە کۆی ٥٩
هەزار و ٣٨٩ فۆرم ٤٦ هەزار ٥٠٧ فۆرم بە تەواوی وردبیینیان بۆ کردووە و ئامادەن بۆ
تیروپشک و لە چەند رۆژی داهاتوودا پرۆسەی وردبینیکردنی فۆرمەکان بە کۆتایی دێت و
دواتریش قوناغی بەراورد کاری ناوی حاجیان دەستپێدەکات.
دەشڵێت، هەر
کەسێک پێشووتر وەکو هاوڵاتی حەجی کردبێت ئەوا مافی نابێت جارێکی دیکە حەج بکات و
دەرفەتەکە بۆ هاوڵاتیانی دیکە دەبێت کە تاوەکو ئێستا حەجیان نەکردووە ئەمەش لەسەر
بنەمای یەکسانی و پەیرەوکردنی دادپەروەری لە نێوان هەموو هاوڵاتیانی کوردستان بەبێ
جیاوازی و بە ئەگەری زۆرەوە لەم مانگەدا تیروپشکی ناوی حاجیان ئەنجام دەدرێت.