بۆچی دەبێت لەگەڵ هاوسەرەکەت سەیری فیلمە رۆمانسییەکان بکەیت؟

PM:04:52:25/10/2021

20780 جار خوێندراوەتەوە

توێژینەوەیەکی ئەمەریکی نوێ ئاشکرایکردووە، ئەگەر هاوسەران لە ماوەی مانگێکدا پێنج فیلمی رۆمانسی سەیربکەن، ئاستی جیابوونەوە بۆ نیو ئەوەندە کەمدەبێتەوە.

لە وردەکاریی توێژینەوەکەدا کە ماڵپەڕی لوبنان ٢٤ ئاماژەی پێکردووە و لە زانکۆی رۆچستەری ئەمەریکی ئەنجامدراوە دەریخستووە، ئەو فیلمانەی باسی پەیوەندی خۆشەویستی و ژیانی هاوسەریی دەکەن، دەکرێت بکرێن بە مەڵبەندی وەرگرتنی زانیاری لەبارەی شێوازی رەفتاری دروست، هاوژیانی هاوسەران بەیەکەوە، ئەمەش بەچاوپۆشی لەو کێشە و گرفت و نەهامەتییانەی لە ژیانیاندا هەیە.

هەروەها ئەم رێگەیە بە شێوازێکی زانستی دادەندرێت بۆ دروستکردنی گۆڕانکاریی بنچینەیی لە رەفتارەکانیاندا لە ناوەوە و دەرەوەی ماڵەکەیاندا.

رۆناڵد رۆج رێکخەری توێژینەوەکە دەڵێت، کات بەسەربردن لەگەڵ هاوبەشی ژیاندا لەکاتی سەیرکردنی فیلمێك پەیوەندییەکی بەتین دروستدەکات لەنێوان ئەو ژن و پیاوەدا، هەروەها وادەکات زیاتر نزیكبن لەیەکەوە لە رووی دەروونی و سۆزدارییەوە، جگە لەوەش وادەکات بەدرێژایی کات زیاتر پەیوەستبن بەیەکەوە.

هەروەها توێژینەوەکە ئەوەی ئاشکراکردووە، سەیرکردنی فیلمێکی رۆمانسی لێکتێگەیشتن و پەیوەندی نێوان ئەو دوو هاوسەرە زیاتر دەکات کە هەوڵدەدەن لاسایی کەسایەتییەکانی ناو فیلمەکان بکەنەوە کە بەشێوەیەکی ئەرێنی رەفتار لەگەڵ یەکدا دەکەن، هەروەها وادەکات ئەو دوو هاوسەرە گفتوگۆ و وتوێژ بکەن لەبارەی فیلمەکەوە ئەمەش وادەکات پەیوەندییان بەیەکەوە پتەوتر بێت.