نانخواردن بە دەستی ڕاست نەریتێکی بەبەهایە کە ڕەگ و ڕیشەی لە ئایین، ئادابی کۆمەڵایەتی و پاكوخاوێنیدا داڕێژراوە

لە ڕووی ئایینی و نەریتەوە، پەیڕەوکردنی سوننەتی پێغەمبەری ئیسلامە (د.خ) کە ڕێنمایی کردووە دەستی ڕاست بۆ نانخواردن و خواردنەوە بەکاربهێنرێت و دەستی چەپ بۆ کاروباری پاککردنەوە بهێڵرێتەوە.

ئەم جیاکردنەوەیە سنوورێکی ڕوون لە نێوان کارە خاوێنەکان و پاککردنەوەدا دروست دەکات،هەروەها بەکارهێنانی دەستی ڕاست بۆ کارە ڕێزدارەکان وەک نانخواردن، سڵاوکردن و بەشکردنی خۆراک، نیشانەی ڕێز و ئادابی بەرزە.

لە ڕووی تەندروستیشەوە، نانخواردن بە پەنجەکانی دەستی ڕاست بە شێوەیەکی سروشتی خێرایی نانخواردن خاو دەکاتەوە، کە ئەمەش یارمەتی جیوینی باشتر دەدات و گەدە بە ئەنزیمە هەرسکەرەکان ئامادە دەکات بۆ هەرسکردنێکی ئاسانتر.