دەرمانسازێکی بەریتانی هۆشداری دەدات لە مەترسییەکانی بەکارهێنانی درێژخایەنی دەرمانی دڵەکزێ و گەڕانەوەی ترشەڵۆک لەسەر تەندروستی هەرس.

دیبۆرا گرایسۆن دەرمانسازی بەریتانی گرتەیەکی ڤیدیۆیی بڵاوکردووەتەوە کە زیاتر لە ٤٢ هەزار بینەری هەبووە، گرایسۆن ڕوونیکردووەتەوە کە دەرمانی ئۆمێپرازۆڵ ڕەنگە بۆ ماوەیەکی کاتی نیشانەکانی دڵەکزێ کەم بکاتەوە، بەڵام دەبێتە هۆی کێشەکانی وەک ئاوسانی سک، سکچوون، زیادبوونی کێش و کەمی ڤیتامینەکان.

گرایسۆن باس لەوە دەکات کە ئۆمێپرازۆڵ کاردەکات بە وەستاندنی بەرهەمهێنانی ترشی گەدە کە بەرپرسە لە گەڕانەوەی ترش بۆ ناو سورێنچک، ئەمەش بە چارەسەرێکی کورتخایەن دادەندرێت بەڵامئەگەر بۆ ماوەیەکی زۆر بەکاریبهێنیت ئەوا زیان بە تەندروستی هەرس دەگەیەنێت چونکە ترش پێویستە بۆ تێکدانی خۆراک و چالاککردنی ئەنزیمەکان و هەڵمژینی ماددە خۆراکییە سەرەکییەکانی وەک ڤیتامین B12، ئاسن ، کالیسیۆم و مەگنیسیۆم.

ئاماژەی بەوەشکردووە، کەمی ترشی گەدە مەترسی تووشبوون بە هەوکردن زیاد دەکات و دەبێتە هۆی نارەحەتی گەدە و ڕیخۆڵە وەک ئاوسانی گەدە، قەبزی، سکچوون هەروەها بەرگرییە سروشتییەکانی جەستە لە بەرامبەر بەکتریا زیانبەخشەکان لاواز دەکات.

گرایسۆن جەختی لەوە کردەوە کە گۆڕانکاری لە شێوازی ژیاندا دەتوانێت نیشانەکان کەم بکاتەوە، وەک خواردنی هێواش، دوورکەوتنەوە لە تەکنەلۆژیا لەکاتی نانخواردن، ڕاهێنانی هەناسەدان، دوورکەوتنەوە لە خۆراکە ناتەندروستەکان.