شەکر یەکێکە لە پێکهاتە باوەکانی خۆراکی ڕۆژانەمان، بە شێوەیەکی دیار لە شیرینی و خواردنەوە گازییەکاندا هەیە، هەروەها لە زۆرێک لە بەرهەمە خۆراکییە ئامادە کراوەکاندا هەیە.

لە ماڵپەڕی "lebanon24" بڵاوکراوەتەوە، هەرچەندە جەستە پێویستی بە شەکر هەیە وەک سەرچاوەیەکی وزە، بەڵام زیادەڕۆیی لە خواردنی دەبێتە هۆی زیانێکی گەورەی تەندروستی، بەم شێوەیە:

١.زیادبوونی کێش و قەڵەوی:

شەکر کالۆری بەرزی تێدایە بەبێ ئەوەی هیچ بەهایەکی خۆراکی هەبێت، ئەمەش دەبێتە هۆی زیادبوونی کێشی جەستە، بەتایبەتی کاتێک بەڕێژەیەکی زۆر ڕۆژانە بخورێت، شەکر دەبێتە هۆی هاندانی ئارەزووی خواردن و هەستکردن بە تێربوون کەمدەکاتەوە، ئەمەش دەبێتە هۆی زیادەڕۆیی لە خواردن.

٢.زیادبوونی ئەگەری تووشبوون بە نەخۆشی شەکرە:

زۆرخواردنی شەکر وادەکات زیاتر پەنکریاس کار بکاتئەمەش بەرگری ئەنسۆلین لە جەستەدا زیاد دەکات و دەبێتە هۆی تووشبوون بە نەخۆشی شەکرەی جۆری دووەم.

٣. تووشبوون بە نەخۆشییەکانی دڵ:

شەکر ئاستی ترایگلیسیرید و کۆلیسترۆڵی خراپ (LDL) لە خوێندا زیاد دەکات، هەروەها کاریگەری لەسەر پەستانی خوێن دەبێت، ئەمەش ئەگەری تووشبوون بە نەخۆشییەکانی دڵ و خوێنبەرەکان زیاد دەکات.

٤. خراپبوونی ددان:

بەکتریاکانی ناو دەم خۆراک لە شەکر وەردەگرن و ترشەڵۆک بەرهەم دەهێنن کە هێرش دەکەنە سەر مینای ددان و دەبێتە هۆی خراپبوونی ددان و نەخۆشی پووک.

٥. ئالوودەبوون و گۆڕانی باری دەروونی:

شەکر کاریگەری لەسەر مێشک هەیە بە شێوەیەکی هاوشێوەی هەندێک مادەی ئالوودەبوون، دەبێتە هۆی گۆڕانی باری دەروونی و هەستکردن بە وزەی کاتی و دواتر دابەزینی بەرچاوی وزە، کاریگەری نەرێنی لەسەر تەرکیزکردن و باری دەروونی گشتی دەبێت.

٦. لاوازبوونی سیستەمی بەرگری جەستە:

هەندێک لە لێکۆڵینەوەکان ئاماژە بەوە دەکەن کە شەکر کارایی سیستمی بەرگری جەستە کەم دەکاتەوە، بەمەش جەستە زیاتر تووشی نەخۆشی و هەوکردن دەبێت.

٧. زیادبوونی ئەگەری تووشبوون بە نەخۆشییە درێژخایەنەکان:

زۆر خواردنی شەکر پەیوەندی بە زیادبوونی مەترسی تووشبوون بە هەندێک شێرپەنجە و کێشەی جگەرەوە هەیە، وەک نەخۆشی چەوری جگەر.