بەشێک لە دراوسێکانی ئەو ملیاردێرە گلەییان لەو پشێوییانە کردووە کە بەهۆی بوونی مارک زوکەربێرگەوە دروست بووە.

ڕۆژنامەی "نیویۆرک تایمز" بڵاویکردووەتەوە، مارک زوکەربێرگ لە ساڵی ٢٠١١ەوە زیاتر لە ١١٠ ملیۆن دۆلاری خەرجکردووە بۆ کڕینی لانیکەم ١١ خانوو لە کرێسێنت پارک لە ویلایەتی کالیفۆرنیا، گۆڕینی بۆ کۆمەڵگەیەکی نیشتەجێبوونی یەکگرتوو کە قوتابخانەیەکی تایبەت بۆ منداڵەکانی لەخۆدەگرێت، ئەمەش ڕێوشوێنی توندی ئەمنی و میوانداریکردنی ئەو ئاهەنگانەی بەدوای خۆیدا هێناوە کە بەشێک لە دراوسێکانی توڕە کردووە.

ڕۆژنامەکە لە زاری دراوسێکانیەوە ڕایگەیاندووە کە هەست دەکەن بەرپرسانی شارەکە و ئەفسەرانی پۆلیس ڕێزێکی زۆر بۆ زوکەربێرگ نیشان دەدەن بەبێ ئەوەی بیر لە دانیشتوانی گەڕەکەکە بکەنەوە.

ڕۆژنامەکە بڵاویکردووەتەوە، دیارترین گلەیی دراوسێکانی سەبارەت بەو سیستەمە بەرفراوانەی چاودێریکردن بووە کە مارک زوکەربێرگ لە ناوچەی نیشتەجێبوونی خۆیدا بەکاریدەهێنێت، کامێرای لەسەر ماڵەکانی داناوە کە دەڕوانێتە سەر موڵکی دراوسێکان، ئەمە جگە لەوەی تیمێکی پاسەوانی تایبەت کە لەناو ئۆتۆمبێلدا دادەنیشن و چاودێری ڕێبواران دەکەن، تەنانەت لێیان دەپرسن بۆچی لە گەڕەکەکە هاتووچۆ دەکەن هەروەها گلەیی لە ئاهەنگە بەردەوامەکانی دەکەن کە کارمەندانی کۆمپانیاکانی زوکەربێرگ لە چەند ماڵێکی چۆڵ ئەنجامی دەدەن.

گلەیییەکی دیکە ئەوەیە کە بە مامەڵەی تایبەت ناویان بردووە، باسیان لەوە کردووە کە کۆتایی هەفتەیەک، پۆلیس ڕێگایەکی گشتی داخست و ناوچەیەکی چۆڵکردنی دامەزراند بۆ دڵنیابوون لە سەلامەتی ئاهەنگێکی تایبەت کە میوانە بەناوبانگەکان بەشدارییان تێدا کردووە، ڕێگری لە دراوسێکان دەکرد لە شوێنی ئاسایی خۆیان ئۆتۆمبێل رانەگرن.