لە مەسعود پزیشکیانەوە بۆ مەسعود بارزانی
PM:08:00:24/06/2025
3244 جار خوێندراوەتەوە
ناسیح مه‌لا كه‌ریم
+
-
(سەركردە) پێگەو پێناسەی خۆی هەیە و لە هەردوو
زانستی سیاسی و بەڕێوەبردندا زۆر جیاوازە لە ( سەرۆك) گرنگترین خاڵی جیاوازی نێوان ئەو دوو چەمكەش میكانیزمی
دانانی هەریەك لە سەركردەو سەرۆكە، سەركردە هەڵقوڵاوی مەیدانی تێكۆشان و لەدایكبووی
چەندین ناسۆر و ژانە.
بەڵام سەرۆك سەپێنراوە،
دانراوە، مەرج نیە هەلبژاردە و قەبوڵكراوی ژێردەستەكانی بێت. لە ( هونەری سەركردایەتی)شدا،
دەستەواژەیەك هەیە بەم جۆرەیە: ( سەركردەی سەرڕاست و دلسۆز دەڵێت: گەر بەدڵی ئێوە
نەبم وڵات بەجێدێڵم!!! بەڵام دیكتاتۆر دەڵێت: ( گەر بەدڵی خەڵكی نەبم، دەتوانن
وڵات بەجێبهێڵن و سەری خۆیان هەڵبگرن!!!).
پاش رێكەوتنە شومەكەی نێوان هەردوو كۆمپانیای ئەمەریكی (إتش كي إن
إنرجي" و"ويسترن زاغروس")و مەسرور بارزانی/ قوباد تاڵەبانی لە ئایاری ٢٠٢٥، حكومەتی عێراقی
بێویژدانانە ( لەبری سزادانی دەستڕۆشتوانی هەرێم) جامی توڕەیی خۆی رشت بەسەر
موچەخۆرانی هەرێمی كوردستاندا و وا بەرەو سێ مانگ دەڕۆین موچەخۆران و سیاسیە
شكستخواردوەكانی هەرێم، چاوەڕێی رەحمی بەغدادن.
لەسەروبەندی ئەم كێشەیەوە بەڕێز مەسعود بارزانی ( كە هیچ پۆستێكی
ئیداری و دەوڵەتی نیە بەڵام پێموایە سەرجەم كارە حكومیەكانی كوڕ و برازاكەی و
شەریكەكانی دەسەڵات، بە فلتەری دیوەخانەكەی بارزانیدا تێپەڕ دەبن) رایگەیاند ئەم
ناحەقیە( بڕینی موچەی موچەخۆرانی هەرێم) لە كەس قەبوڵ ناكەن؟؟؟
لە ١٣ـی حوزەیرانی ٢٠٢٥ جەنگی ئێران/ ئیسرائیل دەستیپێكرد، دوای چەند كاتژمێرێ
لە بۆردومانی تاران و چەند پارێزگایەكی ئێران، (مەسعود پزیشكییان) سەرۆك كۆماری
ئێران رایگەیاند: ( هێرشەكانی ئیسرائیل بێ وەلام نابن) ، هەروەها رایگەیاند: (
بەهەموو هێز و توانایەكمانەوە بەئەركی خۆمان هەڵدەسین و بژێوی هاونیشتمانیان دابین
دەكەین). دەوامی سەرجەم فەرمانگەو دامودەزگا حكومیەكانیش ( تەنانەت لەو شارانەش لە
ژێر بۆردومانی ئیسرائیلدا بوون) رانەگیرا، بەڵام دەستڕۆشتوانی هەرێم لێرەشەوە
گورزێكی تریان وەشاند لە پرۆسەی خوێندن و بێ هیچ پاساوێك بۆ هەفتەیەك پەكخستنی
خوێندنی باخچە تا زانكۆیان راگەیاند !!.
وا زیاتر لە چەند هەفتە بەسەر هەڕەشەكانی ( بارزانی)دا تێدەپەڕێت و
هاوڵاتیان و موچەخۆران لەوپەڕێ خراپی ژیاندان. ( بارزانی)ش وەك نەبای دیبێت و
نەباران، هیچ هەڵویستێكی نەبوو نەبۆ هاوڵاتیانی ژێر دەستەو فرەكوێخا و فرە شوان و
بێ شوان، نە بۆ وەڵامدانەوەی حكومەتی عێراقی؟؟؟ بەپێچەوانەوە( پزیشكییان) كە
دەسەڵاتەكانی سنوردارە.
كەچی حكومەتەكەی بە توندترین
شێوە وەڵامی ئیسرائیلی دایەوە، هاوكات بریاریشیدا كە مووچەی مووچەخۆرانی وڵاتەكەی بۆ
مانگی 3/1403كۆچی هەتاوی، بۆ سێ رۆژلەوادەی خۆی پێشبخات!!.
ماوەتەوە بڵێین: جەنابی بارزانی!!! پێغەمبەری ئیسلام ( درودی خوای
لەسەر بێت) فەرموویەتی: پیرە ژنێك خرایە دۆزەخ لەبەر ئەوەی پشیلەیەكی زیندانی
كردبوو، نەخواردنی پێدەدا وە نە ڕێگی پێدەدا تا خورادن بۆ خۆی پەیدا بكات) بەڕێزتان بە پلەی یەكەم بەرپرسیارن لە برسی كردن
و بێنانكردنی ملیۆنەها هاونیشتیمانی ئەم هەرێمە!!!
بۆ جەنابی قوباد تاڵەبانیش دەڵێین: بەڕێز مامی بچوك.. ئەرێ جەنابتان
نەبوون لە سەروبەندی بانگەشەی هەڵبژاردنەكاندا، دەنگتان هەڵدەبڕی و هاوارتان
دەكرد: ( ئەوەی لە ژن بدات پیاو نیە!!؟)
ئێمەش دەپرسین: قوربان !!! لە شەریعەتەكەی جەنابتاندا حومكی ئەو كەسە
چییە كە هەزاران ژن و كچی ئەم هەرێمە برسی دەكات و ناچاریان دەكات لە كاتژمێر ٣ـی
بەیانیەوە نازدارەكانیان بەجێبهێڵن و وێڵ بن بۆ پەیداكردنی بژێوی خۆیان و ماڵ و
مناڵیان ، تۆ بڵێی ئەو كەسە چ بێت ؟؟