کەشناسێکی عێراقی رایگەیاند، لە سبەینێوە سێشەممە پلەکانی گەرما بەشێوەیەکی بەرچاو لەسەرتاسەری وڵاتدا بەرزدەبێتەوە. دەشڵێت، "لە کۆتایی هەفتەدا لە ناوچەکانی ناوەڕاست و باشوردا دەگاتە ٤٠ پلەی سیلیزی".
ئەمڕۆ دووشەممە، حسین ئەسەدی کەشناسی عێراق لە فەیسبووکی خۆیدا بڵاویکردەوە، بەگوێرەی نەخشە جیهانییەکانی کەشوهەوا بەرەبیان و ئێوارەی ئەمڕۆ کەشوهەوا سارد دەبێت و لە نیوەڕۆدا مامناوەند دەبێت.
ئاماژەی بەوەشداوە، لە سبەینێوە سێشەممە پلەکانی گەرما بەشێوەی پلەبەندی
بەرز دەبێتەوە و لە کۆتایی هەفتەدا لە ناوچەکانی ناوەڕاست و باشوری وڵات دەگاتە ٤٠ پلەی سیلیزی.
دەشڵێت، لە هەرێم و ناوچەکانی دیکە پلەکانی گەرما بەرزدەبێتەوە، بەڵام
ناگاتە ئەو ئاستەی لە ناوچەکانی ناوەڕاست و باشوردا بەرزدەبێتەوە.
ئەمە لەکاتێکدایە، دوێنێ بەڕێوەبەرایەتی
گشتی کەشناسی و بومەلەرزەزانی هەرێمی کوردستان پێشبینی ٤٨ کاتژمێری داهاتووی بڵاوکردەوە
و بەگوێرەی راگەیەندراوەکە لە زۆرێک لەناوچە شاخاوییەکانی هەرێم و لە هەندێک ناوچەی
پارێزگاکانی سلێمانی و هەڵەبجە بەفر دەبارێت.